Mizoram Government Employees Co-operative Housing Society Ltd. bultuma sorkar hnathawkte chenna hmun tur - Modern Township, Luangmual Govt. Complex-a din tum lungphum puala inkhawm chu nimin tlailam khan I&PR Auditorium-ah neih a ni a, he hmun buatsaihna tur lungphum chu Chief Minister Pu Lal Thanhawla’n a phum a ni.

FMGE&W Vice President, Pu K. Lalsawmvela kaihhruai inkhawmah hian Khuallian Chief Minister Pu Lal Thanhawla chuan Mizoram sorkarin a hnuaia hnathawkte hmakhua leh hamthatna tur a dah pawimawh em em laiin, sum lama harsatna avangin a zawng a zaa duhthusam a hlen thei thin lo erawh pawi a tih thu a sawi a; vawiina hetiang thil sorkar hnathawkte chhawr tangkai tur bul tan a ni thei ta hi hmasawnna rahbi pawimawh tak a tling a ni, a ti. Hmasawnna tana pawimawh sum haichhuah kawnga sorkar hnathawk leh kohhran hrang hrang zirtirna avangin chhiah pek pawimawhzia mipuiin an hria hi thil lawmawm a tling a, chhiah atanga sum tlingkhawm hi hmasawnna hnukpui ber a ni, a ti.

Chief Minister chuan Mizoramin intodelhna kawng a zawh mekah leilung hausakna haichhuah te, kawlphetha leh kawngpui sial lamah te mi rethei leh chanhai zawk dawmchhuahna tur NLUP kalpui mekah te hian theihtawp chhuah zui niin, a hlawhtlinna pawh thui tak state mipuiten an tel tan tawh a ni, a ti bawk.

Modern Township satu tur Company pahnih, Skyline Builders, Kolkata leh Ashoka Nanda Group, Guwahati aiawhin Pu Shekhar Mehta chuan he complex lian tham tak dinna tura an inpuahchah dan tlangpui a sawi a, state dangah te pawh an tih thin angin complex chhungah hian mihring mamawh a kim thei ang bera buatsaih tum a ni, a ti a. Ngaihtuahna fing tak hmanga Mizoram sorkarin a hnathawkte tana hetiang ruahmanna a nei chu state dangte tan pawha thil entawntlak a tling a ni, a ti.

Mizoram Government Employees Co-Operative Society Ltd. Chairman Pu Ramhmangaiha Ralte pawhin he thil tobul leh ram danga an tih dan an zirchian chungchang tlangpui a sawi bawk.

Attachment

  • Loading attachment...