Sakawrdai mipuite tui harsatna sutkianna tur a buatsaih, Sakawrdai Water Supply Scheme Rs.133.72 lacs senga siam chu Deputy Chief Whip leh Bialtu MLA ni bawk Pu R.L.Pianmawia’n a hawng.

He Scheme hawnna inkhawm Er. C.Lallunghnema kaihhruaiah hian Pu R.L. Pianmawia chuan Sakawrdai khaw mipuite harsatna ber pakhat tui lama harsatna chu sutkian a ni thei dawn ta chu lawmawm a tih thu sawiin, hnathawktute hmalakna leh thahnemngaihnaah lawmthu a sawi a. A Bial chhungin hmasawnna rahbi thar duhawm tak tak a hmuh chu lawmawm a tih thu sawiin, bial chhung mipuite tanrualna leh sorkar hmalakna chhuanawm a tih thu a sawi bawk. He water supply scheme hmanga tui an lakte leh an dahkhawlnate leh a hmunhmate a neitu thinlung pu a dimdawi tak enkawl turin mipuite a chah a ni.

Er. Lalrinzuala Ralte, EE, PHE Rural WATSAN Division, Aizawl in technical report a pe a, Er. Lalsanga EE(Planning),E-in-C PHE Office in lawmthu sawiin he inkhawm hi a khar a ni.

Sakawrdai Water Supply Scheme hi February,2009-ah thawh tan niin, May, 2013 khan zawh a ni a. He Scheme hnuaiah hian mi 3500 chu tui hnianghnar taka pek theih tura duan a ni a. Tui dahkhawlna (reservoir) pawh hmun ruk ngawtah siam niin, public stand post leh house connection hmanga pekchhuah a ni ang. Tui hi Tuihnar Tam atanga lak niin, Rapid Sand Filter hmanga thlitfim a ni.