Nimin khan cheng nuai 2.2 senga sak “Remna kum 25 Hriatrengna In”, Zohmun ami chu Deputy Chief Whip leh Bialtu MLA ni bawk Pu R.L.Pianmawia’n a hawng.
He Remna kum 25 hriatrengna lungphun hawnna inkhawm Community Hall, Zohmuna neihah hian Pu R.L.Pianmawia chuan buaina leh inremlohna hmuna thanlen chu a hreawm thu sawiin, remna hi a hluin,hmasawnna thlentu a ni, a ti a. Remna Mizoramin a neih theih nana hmalatu leh tha leh zung sengtute fakin, Mizoramin hmasawnna hmel duhawm tak a hmuh te chu remna a awm vang a ni, a ti a. Remna a awm zel theih nan tanrual a tul thu sawiin, mitinten remna awm nan mawh kan phur a ni, a ti.
Pu R.L.Pianmawia hian Zohmun Higher Secondary School- a Computer room chu a hawng nghal a, zirlaite chu taihmakna leh tih tak takna nena zira mithiam tak ni thei tura tang turin a fuih a ni.
