Aizawl, Lunglei, Champhai, Kolasib, Serchhip leh Mamit District-a 19th General Election to Village Council chu February/March 2015 hian neih a ni leh dawn ta a. He inthlanpuia hman tur Draft Electoral Roll atan chuan Election Commission of India thupek anga Assembly Electoral Roll Revision neih mek a Final Electoral Roll hi hman a ni dawn a. Assembly Roll-te Village Council Roll atana hman anih theihna atan hian 2nd Administrative Reforms Commission leh Commissioner Centre-States Relations-in rawtna alo siam dungzuiin Mizoram Sorkar pawhin Dan thar, The Mizoram (Election to Village Councils) Rules 2014 siam a Rule 16 (2)-ah provision a dah thlap vang a ni. Hetiang ruahmanna hi a awm tak avangin State Election Commission chuan Assembly Electoral Roll ennawn lai hian kum 2015 Village Council inthlanpuia vote thlak ngei duhte chuan Electoral Roll-a an hming a chuan leh chuan loh lo enchiang a, chuang ngei tur a inhria emaw kum tling tharte emaw chu lo inthunlut ngei turin a ngen a ni. Village Council inthlanpui 2015-a vote thlak thei turte chu ni 1.1.2015-a kum 18 tling chin, India khua leh tui, Scheduled Tribe leh Mizoram Sorkar-in Mizoram a cheng nghet nia a pawm Gorkha te an ni ang a; amaherawhchu, Roll a inthunluh an dilna Village Council Constituency-ah ni 1.1.2015 atanga chhiar letin ni 180 (thla 6) an cheng hman tawh tur a ni thung.

Assembly Electoral Rolls leh Village Council Electoral Rolls inhmantawm a ni dawn ta hi Non-Sixth Schedule Area-a Village Council inthlannaah chuan a vawikhatna tur a ni dawn a, Sawrkar senso a ti tlemin mipui nawlpui tan pawh a zangkhai phah hle tura ngaih a ni.

Commissioner in a ngenna hi mitin ten ngai pawimawha, Assembly Electoral Rolls Revision hi ngaihven turin Commission chuan a ngen a, chutih rualin Electoral Rolls buatsaihtu ERO/AERO/BLO/Designated Officer te chu mipui hnena zau thei ang bera puangzar turin a ngen bawk a ni.