Mizorama National Population Register atana Biometric Census kal zelah October ni 16 leh 17 chhung hian New Secretariat- ah Minister, Chief Secretary, leh Secretary te tan Biometric Enrolment hun buatsaih a ni a. General Administration Department in he hun hi huaihawtin Electronic Corporation of India Ltd, Hyderabad atanga Technician ten mit naute thlalak(iris scanning) leh kutze thlalak (fingerprinting) hi an ti a ni.

Vawiin khan Minister-te Pu Lalsawta, Pu Zodintluanga, Pu PC Lalthanliana, Dr BD Chakma, Parliamentary Secretary-te Pu H.Zothangliana, Pu KS Thanga, Hmingdailova Khiangte, Joseph Lalhimpuia, Lt.Col ZS Zuala, Pu K Lalrinthanga bakah Chief Secretary Pi L.Tochhong leh Commissioner/Secretary engemawzatin biometric enrolment hi an ti a ni.

National Population Register hi India rama mi chengte chhinchhiahna tura kum 2011 a duan kha a ni a.lndia ram chhunga hmun pakhata thla 6 lo awm tawh emaw thla 6 chhung aia tlemlo awm tumte chu chhinchhiah vek tur a ni. NPR ah hian thil chihnih chhinchhiahna siam a ni a, pakhatah chuan mimal tin chanchin(biodata) chhinchhiah a ni a. Hei hi Mizoramah pawh Census 2011 rual khan he chhiarpui hi neih vek a ni tawh a. A dang lehah chuan mimal tin biometric details chhinchhiah leh tur a ni a. Chu chu tuna kaipui mek Biometric enrolment hi a ni. Hetah hian mimal tin mit naute thla leh kutze thla lak a ni a. Heng information te hi UIDAI(Unique Identification Authority of India) ah thehluh niin India rama mi chengte tan Aadhar Card(smart card) neih theuhna tur a ni. Mizorama District hrang hrangah a rualin hei hi kaipui mek a ni a. Prime Minister chuan December 20 ah BME hi zawh vek tur a tih avangin he thil hi chak taka bawhzui a ngai a ni.

Aadhar number hi mi pakhat tan pakhat zel pek a ni a, mi pahnihin card number thuhmun a intawm theih loh. Uluk taka chhinchhiah an nih avangin mi bum nana midang lem a chan a har hle tawh dawn tihna a ni. Aadhaar hmang hian awlsam takin bank account hawn te, online a ticket lei te, passport dilte a theih a. Sorkar tan pawh thingtlang kilkhawr zawka chengte awlsam leh hmaih nei lova a tanpui theihna tur hmanrua a ni a, sorkar atanga hamthatna dawn theih hrang hrangte he card kaltlang hian mipuite ban phakah a chhawp chhuak dawn a ni.

Amaherawhchu, he card nei ve lote pawh hian sorkar atanga hamthatna an dawn theihna turin Supreme Court in September 2013 ah khan interim order a lo tichhuak tawh a. Card nei lote pawhin card nei te hamthatna dawn theih ang an dawng thei vek dawn thova, card neitute tan erawh kawng tam takah awlsamna a siamsak thung dawn a ni.