ZoCareer Solutions buatsaih State Level Aptitute Test (SLAT 2014) result chu vawiin khan Vanapa Hall-ah puan a ni a, Finance Minister Pu Lalsawta chuan khuallian niin he exam a tithate hnenah lawmman a sem a, SCERT Director Pi Malsawmthangi chu khual zahawm a ni.
Pu Lalsawta chuan thiamna leh hriatna tihpun leh tihhmasawn hi Zofate tan kan ram siamna tura thil pawimawh ber a ni, a ti. Hmanlaiah chuan miin tharum hmangin ro a rel thin a, tunlaiah erawh chuan thluak hmangin miten khawvelah ro an rel tawh zawk a, mihringten taksa chakna avanga kan tihtheih sang lo mahse thluak avangin thil tam tak kan ti thei a ni, a ti a. Leilung hausakna nei lem lo Mizoram hian human resource ah kan hausaka, hma kan sawn phawt chuan, he kan thluak hmang hian khawvel hi kan hneh thei dawn a ni, Minister chuan a ti.
Khualzahawm Pi Malsawmthangi pawhin zirlaite fuihin hlawhtlinna bul chu taihmak a ni tiin tunlaia social media leh games atchilh mek zirlai tam tak an awm chu thalo a tih thu leh zirlai hlawhtlin tak tak tum tan chuan heng laka insum theih a tul thu a sawi a ni.
Mizorama a vawikhatna ni turin SLAT 2014 hi syllabus mumal tak siamin October ni 10 khan Govt.Hrangbana College leh Govt Mizo Higher Secondary School ah te exam hi buatsaih a ni a. Mizoram chhunga Science subject awmna school 35 atangin zirlai 1000 chuang an exam a ni. Zawhna pawh uluk taka duan niin Banking leh Central Service exam thenkhatte nen kalphung inanga siam a ni.
SLAT 2014 a lawmman la tute chu: pakhatna - Lalnunhlua s/o Lalhriatpuia (St.Pauls Higher Secondary School) in certificate, cheng 10,000 leh samsung galaxy tab 3 a dawng a; pahnihna C.Laltlanhlua s/o C Lalchhuanawma (St Pauls Higher Secondary School) in cheng 5,000, samsung galaxy tab 3 leh certificate, pathumna Imanuel Lalrinchhana s/o Vanlalfela (St Joseph Hr.Sec.School) cheng 5000,galaxy tab 3 leh certificate, palina David Paul Thanga s/o Lallianthanga (L) (Greenland Hr.Sec.School) in galaxy tab 3 leh certificate; pangana Raldy Vanlalrinfela s/o R.L.Laldingngheta (St.Pauls Hr.Sec.School) niin certifiate leh samsung galaxy tab-3 a dawng a ni. Heng bakah hian parukna atanga sawmna te’n certificate leh consolation prize an dawng bawk.
