Vawiin khan Lunglei District Nehru Yuva Kendra (NYK) chuan Rahsiveng Indoor Stadium-ah ‘District Youth Convention’ an nei a, hnamlam intihsiakna neih a nih bakah Youth Club 12 hnenah Sports materials sem a ni. he hun hmanpuitu DIPRO, Lunglei District Pi Mina Zoliani chuan lawmman semin kumin 2014-a Outstanding Youth Club Award chu Bazar Branch YMA, Zobawk hnenah hlan a nih tur thu a puang bawk a ni.

NYK District Coordinator Pu Raj Kumar Joshi pawhin an hmalakna hrang hrang tarlangin tun dinhmunah NYK Volunterr 10 an awm thu leh Lunglei District hmun hrang hrangah sports, cultural meet leh youth camp hmangin thalai tam takte an chher mek thu a tarlang a. Mizoram-ah chuan Lunglei District hi NYK chak leh thawk tha ber a nih thu a sawi bawk.

Vawiina hnamlam intihsiakna-ah Rahsiveng pakhatna, Chanmari Veng pahnihna leh Venglai chu pathumna an ni.