Mizoram sorkar hnuaia Department of Agriculture chuan vawiin khan Lunglei Circuit House Conference Hall-ah Quarterly Review Meeting (2nd Quarter 2014) an nei a. Review Meeting hawnna hi Agriculture Director Dr.C.Lalzarliana-in kaihruaiin Khuallian HPC Vice-Chairman Pu S.Laldingliana leh Khualzahawm Lunglei DC Pu Ashish Madhaorao More ten he hun hi an hmanpui a ni.

Khuallian HPC Vice-Chairman Pu S.Laldingliana chuan Agriculture Department Review Meeting Aizawl pawna a vawi khatna atana Lunglei-a nghah a nih chu a lawmawm hle a ni tiin District dang atanga Agriculture Department officials leh thawktu lo kal zawng zawngte lawmna chibai a buk a ni. Agriculture Department-in a hun tak zelah an hnathawh ennawnna (review meeting) an neih thin chu lawmawm a tih thu sawiin Pu S.Laldingliana chuan Mizoram pumah lo hal (jhum cultivation) chu 8.40% in a tlakhniam theihna chhan pawh Department-te inpekna leh thawhrimna vang a ni, a ti. Mizoram-in buhfai-ah harsatna a tawh mek chungchangah pawh Agriculture Department hmalakna chu a pawimawh hle a, state chhungah buh thar tihpunna kawngah tanlak a ngai tak meuh a ni, a ti.

Khualzahawm Lunglei DC Pu Ashish More pawhin thu sawiin sorkar Department-te tan review meeting pawimawhna chu an hnathawh chhui kir a, an ruahmanna hrang hrangah hmasawnnate leh tanlakna turte a hriat theih thin a ni, a ti. Rampumah sorkarin ‘Budget Outlay’ aiin ‘Budget Outcome’ a ngai pawimawh zawk tawh a, chumi awmzia chu hmasawnna atana sum dah a nih rualin chumi sum hmanga eng chin nge hlawhtlinna hmuh a nih tawh tih chu sorkar laipui chuan Department hrang hrang ten an vil reng turin a beisei a, chuvang chuan sorkar sum hmandanah fimkhur leh dik taka kan tih theuh a pawimawh a ni, a ti. Pu Ashish More chuan State sum dehchhuah tihpun nan Agriculture, Horticulture, AH&Vety, Fisheries, Sericulture leh a kaihhnawih Deaprtment-te an pawimawh hle a ni, a ti a. Mizoramin Agriculture-ah an hnathawh that avanga kum 2 lai lawmman a lak tawh chu kuminah pawh lak leh ngei tumin theihtawp chhuah turin Department hnathawkte a chah a ni.

Agriculture Director Dr.C.Lalzarliana chuan an Department hmalakna hrang hrangah Lunglei High Powered Committee chuan a thlawp that thin avangin HPC Vice-Chairman Pu S.Laldingliana chungah lawmthu a sawi a. Agriculture Dept. hmalakna hrang hrang tarlangin kum 2013-2014 chhunga hmasawnna an hmuh a tarlante chu a hnuaia mi ang hi a ni :

1. Kum 2012-2013 chhung khan Wet Rice Cultivation Area (buh chinna hmun) chu 14,330 hectares(ha) a ni a, kum 2013-2014 tun dinhmunah 15,620 ha ni chhovin, a punna hi 9% a ni.

2. Kum 2012-2013 chhung khan lo hal (jhum cultivation area) chu 24,706 ha a ni a, kumin 2013-2014 chhung hian 22,633 ha ah tlathlain, a tlakhniamna hi 8.40% a ni.

3. Kum 2012-2013 chhunga buhthar zat chu 57,700 MT niin kumin 2013-2014 chhung hian 58,994 MT ni chhovin, a punna hi 2.12% a ni.

4. Kum 2012-2013 chhunga Oil Palm chinna hmun zau zawng chu 13,056 a nih laiin kumin 2013-2014 chhung hian 17,588 a ni tawh a, a punna hi 34.71% a ni.

Dr.C.Lalsangliana chuan Oil Palm hi Champhai tih loh District dang zawng zawngah hlawhtling taka chin zel a ni tih a sawi a; Bukvannei, Kolasib District-ah Oil Palm Mill sak zawh ni tawhin tun thla October ni 28 khian Mizoram Chief Minister Pu Lal Thanhawla’n a hawn theih beisei a ni, a ti.