Vawiin khan Agriculture Department hnuaia ‘Soil Testing Laboratory’ chu Dr.C.Lalzarliana, Director, Agriculture (CH) in a hawng.

Laboratory hawnnaah Agriculture Director Dr.C.Lalzarliana chuan thu sawiin Mizoten Agriculture lama hma kan sawn tur atana pawimawh em em leilung endikna ‘Soil Testing Laboratory’ hawn theih a nih chu a lawmawm tak zet a ni, a ti. He Soil Testing Laboratory hmang hian loneituten an ram leilunga thlai-chaw hrang hrang awm zat leh a mamawh belh zat an hre theih dawn a, chumi hmang chuan leitha (chemical leh fertilizer) mamawh zat dik tak a hriat theih tawh dawn bawk a ni, a ti. Soil Testing Laboratory-ah hian Lunglei District bakah Lawngtlai leh Saiha District atanga soil sample-te pawh endik thei tura ruahmanna siam a ni a, chhimlama loneitu ten tangkai taka an hman atan duhsakna a hlan a ni.

Soil Testing Laboratory-ah hian Spectrophometer hmangin leilunga ‘phosphorus’ awm zat a hriat thei a, Flame Photometer hmangin leilunga ‘potassium’ awm zat a hriat theih thung dawn a ni. Automatic Nitrogen Distillation System hmangin leilunga ‘nitrogen’ awm zat a hriat thei ang a, Soil pH meter hmang hian lei thur dan a hriat theih bawk a ni. He Soil Testing Laboratory-ah hian kum khatah soil sample 10000 test theih tura beisei a ni.