General Elections to Lok Sabha, 2019 atana Mizoram a vote thlak ni 11th April, 2019 khan Vanglaini Nitin Chanchinbu ah candidate symbol dik lo tihchhuah a nih avang leh Lunglei ah Candidate list chuanna poster tarchhuah ah Sl.No 4 leh Sl.No 5 inthlak thleng a awm avangin CEO office ah complaint pahnih dawn a ni a.

Hemi chungchanga thil awm dan leh hmalak dan te chu hetiang hi a ni.

11th April 2019 a Vanglaini  Nitin Chanchinbu ah Candidate symbol dik lo tarlan a ni a, vote thlak ni a nih tawh avangin siam thatna hun a awm tawh lo bawk a ni. Dan tehna atang chuan he thil thleng a mawhphurtu chu a Editor leh Publisher a ni, hei vang hian Returning Officer pawhin Editor lakah hian FIR a thehlut a ni. He FIR ah hian Candidate hming pakhat mah a lang lo.

Amaherawhchu, Pu Lalnghinglova Hmar hi Joint Editor leh Candidate ni bawk anih avang hian thu in chuh (Confict of Interest) a awm lo thei lova, sub section (4) of Section 123  of The Representation of the People Act, 1951 bawhchhiatna a nih avangin ani leh he chanchinbu Editor hnenah hian Show Cause Notice pek a ni.

He thila hriattur pawimawh tak chu Representation of the People Act, 1951 leh Criminal thubuai (Criminal liability) hi thuhmun a ni lo.

Vanglaini Chanchinbu Editor hian Show Cause Notice chhanna hi thehlutin tihsual palh a nih thu a sawi tawh a, a mawhphurhna emaw hremna emaw tun dinhmunah hian pek tumna a awm lova. Returning Officer hian hlei bik nei lovin, dan in a tih angin hma a la a ni.

Heti chung hian Independent Candidate Pu Lalnghinglova Hmar Election Agent Pu Lalhnehzauva chuan 18th April 2019 khan, CEO office ah complaint thehlut lehin Independent Candidate Pu Lalnghinglova Hmar'n Show Cause Notice a hmuh hma hian Social Media ah  a copy vawrh darh a ni a  tih bakah a laka FIR thehlut angin a tarlang a. Rang taka hmalak niin CEO office chuan RO/DEO, Aizawl District leh ARO/DEO, Lunglei te chu thil awmzia sawifiah turin a hriattir a ni

11th April 2019, vote thlak ni vek khan Lunglei District chhunga Polling Station thenkhat ah Contesting Candidate te tarlanna serial number leh hming Form 7A leh EVM Ballot paper nen a in mil loh avangin Pu K. Hrangthantluanga, Member, Coordination Committee, LDCC& ZPM Coordination Committee chuan complaint a thehlut a, Pu Lalhruaitluanga Kawlni Secretary Joint MPCC &ZPM Campaign Committee pawhin thehlutin,  complaint hi hmuh a nih rualin Lunglei District Election officer chu enquiry la turin leh poster dik lo tarchhuah te thlak nghal turin CEO office chuan a hriattir a. Hemi ni vek hian Lunglei DEO chuan chhanna rawn thehlutin, complaint thehluttu Pu K. Hrangthantluanga pawh hian LDCC &ZPM Coordination Committee, Lunglei District hruaitute hriatpuina in ngun taka an ngaihtuah hnuah an complaint hi an hnuhkir thu ziakin a thlen a ni.  Lunglei DEO chuan poster dik lo te hi vote thlak ni hma (one day before poll day) khan an hriat chhuah thu a sawi a, hei vang hian Sector Officer kaltlangin Lunglei khaw chhung leh a chhehvela an lo tar tawh te pawh a zan la la hian lak thlak tir leh an nih thu a tarlang a. Thorang Assembly Constituency bika Polling Station pahnih Dengsur leh Rangte te kha biak pawh an harsat avangin 10th April 2019 zan khan an la thla hman lova, amaherawchu vote thlak ni 11th  April 2019 khan an lak thlak hman thu a sawi bawk a ni.

18th April 2019-a Pu Lalhnehzauva, Pu Lalnghinglova Hmar Election Agent Complaint thehluh ah khan he thil hi tarlan nawn leh a ni a. A complaint thehluh ah hian RO leh ARO, Lunglei District te hming a lan avang hian an hnenah hian he thil awmzia hi sawifiah tura tih an ni a. Returning Officer chuan ziaka complaint  a hnen a thlen loh avangin a tana action lak theih a nih loh thu a tarlang a. ARO, Lunglei District pawhin hma an lakna te leh Thorang Assembly Constituency bika polling station pahnih Dengsur leh Rengte ah te ngei pawh hian vote thlak tan hma khan poster dik lo te chu la thla in, Form 7A photocopy a thlak thleng anih thu a sawi a ni. Hemi chungchang hi ziakin Pu Lalhruaitluanga Kawlni, Secretary , Joint  MPCC & ZPM Campaign Committee hnenah pawh hian  hriattir a ni tawh a ni.

 29th April 2019 khan Pu  James Thanghmingmawia, MPCC legal Department Secretary chuan Lunglei Police Station ah Returning Officer leh Assistant Returning Officer te lakah FIR a thehlut tih hriat a ni a. 1st May 2019 khan he FIR chungchang hi Chief Judicial Magistrate, Lunglei District Court-ah ngaihtuah a ni a, he FIR hi CJM, Lunglei District Court chuan ngun taka a zirchian hnuah Section 80 of the Representation of the People Act, 1951 in a tarlan angin “inthlan” (election) chungchang a ni a, hei vang hian he FIR thehluh hi election petition hmanga a ngaihtuah chi a ni a, a ngaihtuah theitu chu High Court a ni tiin, a pawmsak ta lo a ni.

Tum danga inthlan ang bawkin Election Department chuan hlei bik nei lovin, fair takin hna a thawk a, heti chunga an hnathawh te rinhlel awm anga tawngkam chhuak a awm zeuh hi a pawi hle  a ni.