General Elections to Lok Sabha, 2019 leh Aizawl West-I Bye Election-a vote chhiar dan tur “Training on Counting Process” Election Commission of India in a ruahman anga inhrilhhriatna chu vawiin khan Aizawl ah neih a ni. He inhrilhhriatna hun hi Returning Officer, Assistant Returning Officer, Election Officer leh District Level Master Trainer te tana buatsaih a ni.

Training on Counting Process hi Pu Ashish Kundra, Chief Electoral Officer, Mizoram hova neih a ni a. Pu Ashish Kundra, CEO, Mizoram chuan Lok Sabha inthlan leh Aizawl West-I Bye election atana vote thlakna boruak muanawm tak karah Mizoram in a nei thei chu lawmawm a tih thu a sawi a. Mizoram chu vote thlak ni a, vote thlak nawn (re-poll) awm ngaih lohna hmun a nih avang te leh EVM- VVPAT chhia tlemna State a nih avang tein ram pum huap a bikin North East State zingah entawn tlak a nih thu a sawi a, hei vang hian vote chhiarnaah pawh tihsual awm lo tura inpuahchah turin District tina Election lam hotute chu a chah a ni.  Pu Ashish Kundra chuan tun thla ni 17 hi chuan  vote chhiarna hmun tur Counting Hall te peih fel a, endik theih tura hma la turin a chah bawk a ni.

General Elections to Lok Sabha, 2019 vote chhiarna atana inhrilhhriatna hunah hian Pu H.Lianzela, Jt.CEO chuan vote chhiar chungchanga danin a phut leh huamte a sawi a, Pu CC.Lalchhuangkima, Deputy CEO chuan EVM chhiar dan leh inthlan result-a report kimchang pek dan te a sawi bawk a ni. Pu Krishna Mohan Uppu, Addtl.CEO-in Counting Hall/ Centre inpuahchahna te a sawi bakah Pu Malsawmzuala, Asst.CEO in VVPAT chhiar dan chungchang te a sawi a, Pi H.Vanlalruatfeli, Programmer, Election Department in Suvidha Counting Application leh IT hman dan ECI in a duan ang te a sawi  bawk a ni.

Lok Sabha, 2019 inthlan leh Aizawl West I Bye Election atana vote tla te hi tun thla ni 23 zing dar 8 atangin chhiar a ni dawn a. Lok Sabha inthlanpui 2019-a vote tla te hi District hrang hrang a Counting Hall 40 ah chhiar a ni ang. Election Commission of India chuan 30th April 2019 khan Mizoram bika vote chhiarna Returning Officer pui turin Counting  Assistant Returning Officer 30 a rawn ruat thar bawk a ni.   Kumin Lok Sabha inthlan a vote tla chhiarna ah hian a vawi khatna atan Supreme Court thutlukna angin Assembly Constituency tina VVPAT 5 te chu chhiar an ni dawn a, heng VVAT 5 te hi a hmunah pawh chawp (Draw of Lots) tur a ni ang.