Parliament inthlan lo awm tur atana Kolasib, Mamit leh Aizawl General Observer Dr. Rakesh Gupta, IAS chuan vawiin chawhnu khan Kolasib-ah inthlan puah chahna a Nodal Officer hrang hrangte leh Sectoral Magistrate te, Team hrang hrangte hmuin an hmalakna te a sawipui.

Kolasib DC Office chamber ah he meeting pawimawh hi neiin Dr. Rakesh Gupta chuan Nodal Officer theuhte chu an chanpual theuh chhunga an thlen chin te a zawt a. Parliamentary Election hi ECI duhdan ang ngeia felfai taka hlenchhuah a nih theih ngeina turin an hma zawna tihtur theuhte chu mit tlung taka thawk turin a chah a. Election Commission of India in Guideline a siamte chu chhuanlam pakhatmah siam lova zawm mai tur a nih thu a sawi a ni. Kolasib chu VVPAT a vawi khatna atana an hman dawn avangin fimkhur taka engkim ti turin a chah a. Diklo leh felhlel a awmloh nana tangrual tur pawhin a hrilh a ni. Election vuakvet lai hian Media lama thil langte pawh a en ngun dawn tih sawiin thu chhuahte, Dan lekkawhna lam leh Zu leh a kaihhnawih thil te , election thil thleng reng reng te pawh a hnena report pe reng turin Official tehi a chah a ni.

Pu Jitender Yadav, IAS, DEO chuan an District chhung a ralmuan thu leh inpuahchahna pawh tluang taka vawiin ni thlenga bahlahna awm lova an thawh thu a sawi a ni.

Meeting zawh hian Observer hian Strong room leh Counting Hall te a en zui a ni. Pu Rakesh Gupta hi zaninah PWD Staff Lodge ah a riak ang a, be rawn duh tan ph. 8974931684 ah a biak theih ang a, naktuk tlai atangin Aizawla a thlenna State Guest House, Bawngkawnah a be rawn duh tan zing dar 9 atang dar 10 chhungin a hmuh theih bawk ang.