18/2023-2024

Hnahthial the 2nd April 2024: Vawiin chhun dar 12:00 khan Lok Sabha MP inthlan lo thleng tura 1-Mizoram (ST) Parliamentary Constituency General Observer atana Election Commission of India (ECI) in a ruat Dr Nipun Vinayak, IAS hovin Polling official-te khawl hmanga thliarfel thawh hnihna (second randomization of polling officials) video conference hmanga neih a ni a, Hnahthial District atang pawhin District Election Officer Pu Chuauhnuna, Election Officer Pu Lalbiakfela leh SDC Pi Betty Lalrinfeli te an tel ve a ni.

General Observer kaihhruaia randomization neih-ah hian District tina Assistant Returning Officer (ARO) te chuan polling official an neih tur zat dinhmun report an pe a, inthlanna felfai neih a nih theih nana an hmalaknate leh hmachhawp an neih te, hmeichhe hlang vil polling station (All women managed polling station), thalai hlang vil polling station (young polling station) chungchang ruahmanna an neihte ngaihthlak ho bawk niin randomization hi neih nghal a ni. Hnahthial district Chhunga 29-South Tuipui (ST) A/S bikah hian Polling Station 27 awmin reserve team nen team 32 din a ni. Vawiin randomization-ah hian Polling Station  24 a kal tur polling team 24 te bakah reserve team 5, a vaiin team 29 te chu khawl hmanga thliar fel an ni a, hmeichhe hlang vil tur PS pahnih leh thalai hlang vil tur PS pakhat a team kal tur te chu manual a thliar hran an ni leh dawn a ni.