Lunglei District atana General Observers 6 te leh Assembly Constituence 7-a Candidate turte bakah an Agent-te chu vawiin dar 9:30AM khan Lunglei DC’s Conference Hall-ah inhmukhawmin, inthlan chhunga Model Code of Conduct (MCC) chungchang an sawiho a ni.

He meeting kaihruaitu Lunglei DC/DEO Pu V.Sapchhunga chuan Election Commission of India-in a duan ‘Election Model Code of Conduct 2013’ chu chhiarchhuakin political party leh party candidate ten khauh takin an vawng tur a ni, a ti. Party candidate leh an agent te chuan MCC chungchanga an hriatthiam lohte chu General Observer-te an zawt a, inthlan boruak tichhe zawng emaw buaina chawk chhuak theih zawnga engmah tih a rem loh thu Observers ten an hrilh a ni.

Election Model Code of Conduct 2013 chuan politcal party leh an candidate te tih tur leh tih loh tur tam tak a tarlang a ni. Political party-te chu chi leh chi, hnam leh hnam inkarah emaw, sakhaw biak leh tawng inang lote karah emaw inhuatna tichhuak thei thil tihnaah an tel tur a ni lova; mimal nun phawrh zawnga inbei lovin, an party policy, programme leh an hnathawh tawh dan te tarlangin an inbei zawk tur a ni. Party leh candidate reng rengin punkhawmna/kawngzawh huaihawt an tum a nih chuan an punkhawmna huamchhunga sorkar official mawhphurtute leh police hnenah phalna an la tur a ni. Inthlan Ni hma lam darkar 48 chhungin vote zawn nana mipui hrai te, ei leh in leh zu sem te khap a ni bawk.

Meeting zawh hnuah General Observers leh Returning Officers te chuan an vil tur Assembly Constituency theuh-a party candidate leh an agent-te chu a hranin an kawm leh a. An bial chhunga harsatna an neih emaw hriatfiah duh thil bik an nei emaw hrang hrangte an sawipui a ni.