Nimin ah khan Geology & Mineral Resources Minister Pu H. Rohluna leh a thawhpui Parliamentary Secretary Pu Joseph Lalhimpuia leh Pu K. Lianzuala, Chairman, Mizoram KVIB te chuan Geologist-te leh NGO puipa-te hruaiin Oil India Limited(OIL) in Maubuang ramchhunga HydroCarbons zawn hna a thawh mek an tlawh.
OIL hmalakna hmun, Drilling Rig/Exploratory Well, Maubuang ah hian Pu Rupjyoti Phukan, Chief Manager, OIL(NEF), Pu Gautam Das, Chief Engineer, Civil, OIL(Mizoram) leh Pu C.Laldinkima, Deputy Suptd. Geologist, OIL te chuan Official-te leh an mahni zuitu NGO aiawhte chu an lo dawngsawng a. OIL hotute hian Minister leh a team member te hi Derrick structure, Drill Floor, effluent treatment plant leh mud logging unit te an fan pui a ni.
Geology & Mineral Resources Pu H.Rohluna chuan OIL hnathawkte chu an hnathawh tikhaihlak thei, harsatna an tawk palh a nih pawhin a rang lama sawrkar hriattir a sawt tur thu a hrilh a. An leiverh hnathawh te chu chak zawk leh fimkhur taka chhunzawm turin a ngen a. Kumin fur a lo inher chhuah hma ngeia an hna zualpui te thawk zo hman ngei tura tan khawh turin a hrilh bakah an hnathawh te pawh State sawrkar in a la endik leh thin dawn a ni tih a hriattir a. Keifang rama OIL hmalakna hmun panna, Seling-Keifang kawngpui dunga hmun thenkhat lirthei lian chi kal theihlohna lai awm vanga harsatna pawh Chief Minister Pu Lal Thanhawla ruahmanna in sutkian a nih tawh thu OIL hotute hi hrilh in leiverh hna pawh a hma thei ang bera an thawh Mizoram sawrkar chuan a beisei tlat a ni a ti.
OIL hotute hian Parliamentary Secretary Pu Joseph Lalhimpuia zawhna chhangin an hnathawh tikhaihlak thei harsatna pakhat mah an tawh loh thu leh an leiverhna chhehvel khua a chengte pawh an hawihhawm thu an sawi a. Pu Joseph Lalhimpuia chuan kan ramah Hydrocarbons te laichhuak ngei thei turin beiseina lian tak a awm a, heng company te mamawh hnathiam thalai chherchhuah hi sawrkar rilru ah a awm daih tawh a ni a ti a. Sawrkar College 3 ah Geology zirna te kan neih te tihphuisui mek niin MZU ah Post Graduate diploma in Petroleum zir theih a ni thuai dawn a ni a tiin OIL hotute hi ram leilungfa mithiam an hnena hna dil te chu duhsak bik turin a hrilh a ni.
OIL chuan tuna an hnathawh tam ber hi mithiam bik chhawr ngai a nih avangin tualchhung mite thawh thei a la tlem niin an sawi a. An leiverh ah hian Hydrocarbons an laihchhuak hun ah hralh theih tura ruahman a nih phawt chuan hnalak chungchang chu company thuneitute leh state sawrkar in an la sawidun leh ang an ti a. Tun dinhmun ah erawh chuan an hnathawh hi boruak-alhthei emaw Petroleum laihchhuah hna an tih chat ngam loh thu leh exploratory stage a la nih thu an tarlang a ni.Tualchhung mi 30 vel hi nitin hnathawk atan an chhawr mek thu sawiin Mizo tlangval 5 pawh contracted Engineer ah an chhawr tih CEC member te hi an hrilh a ni.
OIL Geologist te chuan Dr.H.Lallenmawia, Director, Geology & Mineral Resources hnenah vawiin thlenga an leiverh thuk zawng leh leihnuai an zu verh thlen chin chu 2.5 Km a nih tawh thu an sawi a. Tuna an lei verh chu an rin ai daihin a sak niin an sawi a, darkar khat chhunga an verh theih zat( Rate of Penetration) chu 2 metre a nih thu tarlang in an leiverh tan tir atang tawhin darkar 24 chhung chu nitin chawl lovin an la thawk zel a ni an ti. Pu C.Laldinkima, Geologist, OIL chuan 4.5 Km a thuk verh thlen an tum thu tarlang in 3.5 Km chin atang hi chuan HydroCarbon hi a awm a nih ngai chuan laihchhuah thut theih a ni tawh a ni a ti.
Maubuang a OIL Exploratory Well tlawhna a telve, Pu Vanlalmuana leh Pu Peter Chhakchhuak, CYMA CEC Member te chuan OIL hnathawkten an leiverhna atanga chhuak chirh/dum leh tuihnang mihring tana hlauhawm an senghawi tha tawklo ni a an hriat thu OIL thuneitute hi a hrilh a. OIL hnathawkte hian leiverh atanga chemical effluent lo chhuak an thenfaina hmun effluent treatment plant kawhhmuh in an lakchhuah hmasak ho hi an ramchhung leikhur thuk takah an phum tih an kawhhmuh a. Effluent Treatment Plant atang hian heng chemical effluent te hi a luangliam lo tih finfiah niin NGO hruaitute pawh hian an lungawi thu OIL hotute hi hrilh in mipui himna dah hmasaber turin an ngen bakah ramleilung fate chu an thawhtheih tawk ah a tam thei ang bera chhawr tura an beisei tlat thu an hrilh a ni.
