Vawiin khan State Task Force Committee for Immunization (STFI) chu an chairman Health & Family Welfare Secretary Pu Lalrinliana Fanai, IAS hovin Secretariat Conference Hall, New Secretariat Complex-ah an thukhawm a, Measles-Rubella (Sentut-German Sentut) Campaign chungchang an rel. He meeting-ah hian Dr. Debashish Roy kaihhruaiin World Health Organisation (WHO) aiawhte an tel a ni.
Pu Lalrinliana Fanai chuan Measles-Rubella Campaign hi Mizoramah uar taka kalpui tum niin, naupang za ah za vaccine pek tum an nih thu sawiin State dangte tana entawntlak tur khawpa hma lak an tum thu a sawi.
He meeting-ah hian Mizoram chhungah Measles-Rubella Campaign neih thuai a nih tur thu leh kalpui dan tur an sawiho a. WHO aiawha lo kal mi sawmparuk zinga mi palite hi he Campaign neihpui tur hian Mizoramah an cham bang zui dawn a, anmahni puibawm turin WHO team member dang lo kal belh tur thu meeting-ah hian tarlan a ni. Measles-Rubella Campaign pawimawhzia hi mipui inhrilhriata a zau thei ang bera thehdarh tul an tih thu sawiin District tina Information Public Relations Officer-te bakah tlawmngai pawlte nena thawk hovin zau zawka inzirtirna kalpui tha an tih thu meeting-ah hian an sawi a ni. Hemi atan hian Director, IPRD chuan, IPRO te chu he campaign committee-a tel turin phalna a pe nghal bawk.
Measles-Rubella Campaign hi India ram hmun hrang hrangah neih mek a ni a, State sawmpanga-ah zawhfel a ni tawh a. Naupang vaibelchhe riat (8) hnenah vaccine hi pek an ni tawh. Tun hnaiah hian hmar chhak State pathum - Mizoram, Manipur leh Assam-ah he campaign hi kalpui tumin ruahmanna siam mek a ni. WHO team te hian Mizoram chhunga District tin an tlawhchhuak vek tawh a, school sawmthum panga (35) an tlawh bakah naupang doctor (paediatrician) pakua an kawm tawh bawk.
Meeting-ah hian Health & Family Welfare Department, National Health Mission, Health Services Department, Social Welfare Department, School Education Department, Information & Public Relations Department, State Immunization Officer, WHO team te bakah mi pawimawh dangte an tel a ni.
