Nizan dar 7:30 khan GIG Motors Pro Volleyball League 2017 (Mipa) Champion Hunthar Volleyball Club ( HVC) chuan an chak lawmna MHIP Hall, Hunthar Veng-ah an nei a. Pu Lal Thanzara, Bialtu MLA chu khuallian niin Pu Lalmuanpuia, Bialtu AMC Councillor chu khualzahawm a ni. 

Pu Lal Thanzara chuan he League-a Champion nihna duhawm tak Hunthar Volleyball Club-in an chang chu lawmawm a ti a. Leimin leh inchim te’n chhungkaw tam tak harsatna a thlen hnuin lawmna zan inher chhuak chu lawmawm atih thu sawiin Mizoram pawn ami player tha chah chhuak thei khawpa Vengchhung mite thahnemngaihna chu entawn tlak a tih thu a sawi a. Bialtu MLA chuan infiamna hrang hrang-ah Mizoram chuan hma kan sawn zela, hetih lai hian infiamna lama kan hmasawnna ruhrel neih te hi thalai te hian kan hmang tangkai tur a ni tiin, Mizo thalai infiammi te chu zuk leh hmuamah insum tur tih hrilh ngai lovin an in vawng fai tawh a ni, a ti a. Club official te leh Coach te pawimawhna tarlangin player te chu entawntlak zel turin leh hun lo kal turah thawhhona tha tak nei chungin taima taka hma la a, Veng mai nilovin Ram tan an khel a ni tih hre reng turin a chah a. Veng tangrual ni zel turin Pu Lal Thanzara chuan duhsakna a hlan nghal bawk a ni. 

Mizoram Volleyball inelna sang ber GIG Motors Pro Volleyball League hi Mizoram Volleyball Association leh LPS Vision tangkawp buatsaih niin GIG Motors te chu bultumtu an ni a. R.Dengthuama Indoor Stadium, Mualpui-ah May 25 - June 20,2017 khan khelh a ni a. He league hnuaia mipa team te chu TNT, Chhinga Veng, Hunthar, 3^rd MAP leh Ramhlun Sporting Club (RSC) te niin hmeichhe team te chu Power Department Sporting Club, Electric Veng leh Durtlang te an ni a. League mipa final ah Hunthar Volleyball Club chuan Chhinga Veng Volleyball Club hnehin, hmeichhe final-ah Power Department Sporting Club chuan Electric Veng an hneh bawk a. He league hi vawi hnihna niin 2016 khan Anastasia Volleyball Club (Electric Veng) te chuan hnehna an lo chang tawh a ni. 

He hun hi Pu Lalhmangaiha Renthlei, LC chuan kaihruaiin Khualzahawm Pu Lalmuanpuia, Bialtu AMC Councillor leh HYMA President Pu Rohmingthanga chuan thu an sawi a. Lawmpuina thilpek hlanna hun neih niin player te an tel kim hle a. HVC Adviser Pu V. Lalrinmawia chuan lawmthu sawina in hun a khar a ni.