Swachh Bharat Abhiyan bawhzuina chi khat atan tukin zing khan Sports & Youth Services Department chuan faina hnatlang (cleanliness drive) a buatsaih a, Aizawl khawpui dung leh sabji bazar bakah infiamna hmun pawimawhte thenfai a ni. AR Ground a hemi pual hian inkhawmna hun tawi hman ni bawkin, hetah hian Sports & Youth Services Minister Pu Zodintluanga chu khuallian a ni a. Parliamentary Secretary Pu Hmingdailova Khiangte a tel bawk.

Minister chuan India rama state fai berah Mizoram chu siam tum a hma lak mek a nih thu leh, chutiang bawk chuan Aizawl chu India khawpui hrang hrang zinga fai ber a nih theih tur thu a sawi a. Chumi atan chuan a ram chhunga cheng ten faina leh thianghlimna an ngaih pawimawh a tul thu sawiin, sorkar pawhin ram fai leh changkang zawka an tih danin khawlai a bawlhhlawh paihte laka pawisa chawi tir theihna dan tunah ngaihtuah mek a nih thu a tarlang. Pu Zodintluanga chuan vawiin hnatlang buatsaih chu faina ngaihpawimawhzia entirna (symbol) mai leh mipui zirtirna tur a nih thu sawiin, vawi khat tihfai hnua theihnghilh zui lova faina chu nitin nunpui theuh zawk a nih tur thu kalkhawmte bulah a sawi a; tibaltu ni lovin tifaitu nih tum theuh turin mipui a chah a ni.

AR Ground-a programme neih hi Pu Zothanmawia, Sports & Youth Services Director in a kaihruai a. Cleanliness drive-ah hian Sports & Youth Services Department hnuaia wing hrang hrangte leh Affiliated Sports Association-te an tel a. NCC, NSS, Bharat Scouts & Guides, Adventure Club, Sports Authority of India (SAI), Sports Association hrang hrang leh Mizoram State Sports Council (MSSC) atangin mi 1700 chuang thawk chhuakin, AR Ground, Rajiv Gandhi Stadium, Mualpui, Sabji Bazar, Ramhlun Sports Complex leh SAI Centre, Mission Vengthlang te an tifai a. Scouts & Guides ten Chanmari atangin leh Sikulpuikawn atangin kawngpuia bawlhhlawh te chhar khawmin AR Ground-ah an intawkkhawm a ni.