Vawiin khan Chief Minister Pu Lal Thanhawla’n tunhnaia Mizoram hmun hrang hranga tui lian leh leimin avanga chhiatna leh harsatna tawk te tanpuina atana Mizoram Football Association (MFA) in The Football Players Association of India (FPAI) XI leh Mizoram XI, Charity Exhibition Match, Rajiv Gandhi Stadium Mualpui-a  an buatsaih 'Kick Off' programme a hmanpui a. FPAI in tun season-a, Coach tha leh Player tha an thlan te chawimawina Indian Football Awards 2017 semna hun match Half-Time-a buatsaih pawh hmanpuiin Foreign Player of The Year Award a hlan a. PFAI leh MFA ten Chief Minister’s Relief Fund atan cheng nuai khat ve ve Chief Minister an hlan a. Mizoram XI aiawhin S. Malsawmtluanga’n  CM Relief  Fund atana player te thawhkhawm sum a hlan a ni.

Exhibition Match tan hmaa a thusawi ah Chief Minister Pu Lal Thanhawla chuan India Football khawvela milar leh thiam ber te sawma MFA in tanpui ngaite tana Charity match a buatsaih chu lawmawm tiin hei hi Mizoram thalai te tan zelna tur petu nise tiin a duhthu a sawi a. Rajiv Gandhi Sports Stadium changtlung zawka buatsaih a nih tur thu sawiin I League khelh leh hma in Stadium chhak lamah Gallery peih fel kan tum ang, a ti. Lammual chu a nih dan ang tur taka hman a nih loh avangin kum 4/5 lekah a chhe tawh a, heng Stadium leh infiamna hmun hma kan neih te hi kan rohlu a ni a duat nachang leh dimdawi taka hman nachang kan hriat a tul a ni, a ti a. Mizorama football hmasawnna leh than zelna chu MFA te thawhrimna leh an tan lakna avanga a ni tih sawiin Rajiv Gandhi Stadium hi sumdawnna atan hman a rem lo a, duat taka enkawl thei leh duat theitu tur te kutah Stadium enkawlna hi kan dah dawn a ni, a ti.

Infiamna abik takin football ah, Mizoram leh Hmarchhak thalai te theihna leh an beiseiawm  tih hi rampumin a hre chho mek a, talent nei tha an zawng mek zel a ni, a ti a. Mizoram hmun 2/3 a football ground siam thar te chu hawn thuai a nih tur thu sawiin Sports Minister viak tha tak enkawlna hnuaiah Mizoram hmun hrang hrangah  infiamna ruhrel tha tak tak din tawh a nih thu leh din chhoh mek a nih thu te a sawi bawk a ni.

Exhibition Match hi Home Minister Pu R. Lalzirliana leh Health Minister Pu Lal Thanzara, MFA President ni bawk te pawhin an chhim a, Indian Football Awards 2017 Awards category thenkhat lawmman an sem bawk a ni. Exhibition Match chhim turin leh Indian Football Awards 2017 semna hun hmanpui turin India Football Team Captain lo ni tawh – Pu Baichung Bhutia leh Pu Rennedy Singh te pawh an lokal a ni.

Mizoram XI ah hian Mizo football thiam leh lar Jeje Lalpekhlua, S. Malsawmtluanga leh Lalrindika Ralte bakah Mizoram Football Club hrang hranga player thlanchhuah te an tel a. FPAI XI ah hian ramchhung footballer hming thang – Michael Chopra, C.K. Vineet leh foreign player lar Alfred Jaryan bakah football thiam leh hmingthang dangte an tel a ni.

Indian Football Awards 2017 ah hian FPAI thlan category 4 awmnin Fans te thlan category pakhat a awm a, heng bakah Special Awards 5 sem a ni. Coach of the Year Award hi Khaled Jamir, Aizawl FC hlan a ni a; Young Player of the Year Award hi Udanta Singh, Bengaluru FC hlan a ni a; Indian Player of the Year Award hi Anas Edathotika, Mohan Bagan FC hnenah hlan niin Fans Choice Player of the Year Award chu CK Vineet Bengaluru hnenah hlan a ni a. PFAI hian Mizoram Football Association in Mizorama football an tihhmasawn chu ngai hluiin Special Awards MFA hnenah an hlan a. Special Awards dawngtu dangte hi coach ni tawh Ranjan Chowdhury; footballer thiam leh lar S. Malsawmtluanga; Sandip Nandy leh Deepak Mondal te an ni.

The Football Players Association of India bultum hian kumtin ramchhung football khawvela hming chher leh tih tha te chawimawina Indian Football Awards buatsaih a ni thin a, tun tum hi Mizoramin he Award a thlen hmasakna ber niin khelmuala an sem vawikhatna a ni nghe nghe a. Kum dangah chuan function ropui tak buatsaih a ni thin a, chutianga an senso atana an dah chu kumin hian CM Relief Fund atana an pe zawk ta a ni.