PHE WATSAN Division, Khawzawl leh Khawzawl Group YMA bultumin nimin chawhma dar 11:00 khan Khawzawl Zaingen YMA Hall-ah Tuihna Humhalh chungchangah leh Faina chungchangah Awareness Campaign neih a ni a, he hun hi PHE Engineer in Chief Pu Lalmuanzova’n khuallian niin a hmanpui.
PHE WATSAN Division, Khawzawl Executive Engineer Pu Lalzakhama kaihhruaia Awareness Campaign neihah hian PHE E-in-Chief Pu Lalmuanzova chuan Tuihna humhalhnaa Khawzawl Group YMA te thawh rah, Success Story an lo ngaihthlak thin thu sawiin faina chungchangah pawh hmahruaitu nih tum tura a duh thu a sawi a, PHE chuan mipuite hnena tui in tur pek bakah thianghlimna lamah hma ala tih sawiin tui leh thianghlimna hmanga mipuite hriselna tha siamsak chu an tum ber a ni a ti a. Awareness Campaign a tel tura sawm zawng zawng deuh thaw an tel thei chuan tuihna humhalh leh faina an ngaih pawimawhzia a ti lang tih sawiin vawiin ni a Awareness Campaign a tel te chu an thil zirte chu an chhungte leh thiante hnenah zirtir ve leh se, nakin lawkah Khawzawl chu khaw fai, khaw nuam, khaw hrisel ala nih theih a beisei tih a sawi a, faina lama an hmalaknaah PHE Department chuan an phak tawk angin khaw fai thlanna te neih an tum tih a sawi tel bawk.
Khawzawl Group YMA President Pu P.C. Rosiama pawhin thu sawiin Khawzawl leh Chawngtlai tuilakna Changel lui chu tuihna ram tih chereu avangin tui a tlem tial tial a, hemi siam tha tur hian Khawzawl Group YMA leh PHED te tangdunin kum 10 dawn lai tui hna ram bua siam tha tura hma an lak hnuah tunah chuan chhuanawm khawpin a ngaw leh tawh a, heta an hmalakna avang hian Tui hna humhalhnaah Central YMA in lawmman a siam chu Khawzawl Group YMA chuan an dawng chho char char tih a sawi a. Khawzawl in Tuichang lui an Pump turah pawh luidung a thianghlim theihna turin Tuichang lui an humhalh thu leh tui a tam reng theihna turin tuihna ramte ti chereu lo tura hmala turin ruahmanna an siam tih a sawi a, tuihna ramte humhalh anih theihna turin a huamchhung Village Council te thawhpuiah a sawm nghal a. Khawzawl Group YMA President hian an Group huamchhungah YMA Branch 20 leh Village Council 17 an awm tih a sawilang bawk.
Vawiina Awareness Campaign neihah hian Pu Lalrothanga, Director, CCDU in kalkhawmte hrilhhriatna neiin he hunah hian Khawzawl Group YMA huamchhunga YMA Branch 20 hruaitute leh YMA Sub-Committee peng hrang hrang hruaitute an tel a, anni bakah hian Khawzawl khawchhunga Village Council Member te, NGO hruaitute leh Sawrkar Department Head te an tel a ni.
