Nizan khan Electric Veng YMA Hall, Aizawl-ah "GIG Motors Taekwondo Fight League Season 3" Final khelh a ni a, Health & Family Welfare Department Minister Dr.R.Lalthangliana chuan khualian niin a hmanpui a, Sports & Youth Services Department Minister Pu Robert Romawia Royte chu khualzahawm a ni. 

Khuallian Dr. R. Lalthangliana chuan he hunah hian thu sawiin tunlaiin nasa takin zofaten sports lamah hma kan sawn a, heng thalaite tan hian sawrkar pawhin a tih tur a ti zel dawn a ni tiin sawrkar anga nasa lehzuala hmalak an tum thu a sawi a. Infiammi te India ram chhung mai duh tawk lova rampawnah pawh India aiawh a fehchhuak thei turin leh Olympic thleng phaka tan la turin a fuih a ni.

Taekwondo Fight League Season 3 Finalah hian Armed veng Warriors chuan veng thenawm Armed Veng South Pasaltha chu 142-138 a hnehin Champion Nomawi leh tangka fai Rs 80,000 an dawng a. Pahnihna Armed Veng South Pasaltha te hian Rs 40,000 an dawng bawk. Semi Finalist St.Joseph HSS RSC Fighters leh Republic Vengthlang Fighters ten Rs 20,000 ve ve dawngin Zopa Goldsmith Chawnpuiin Rs 10,000 an dawng bawk.

Tin, Cadet League Final ah Zopa Goldsmith Chawnpuiin St.Joseph HSS RSC Fighters chu 155-120 a hnehin Champion Nomawi leh tangka fai Rs 30,000 an dawn a, RSC Fighters hian Rs 20,000 an dawng bawk. Team dang pathum ATA Electric Veng Fighters, Exodus English School leh Luangmual Taekwondo Club ten Participation prize Rs 5,000 theuh an dawng.

Inelna dang Dance Battle ah Dangerous Divas chu champion in Nomawi leh tangkafai Rs 20,000 an dawng a, Pahnihna Four Head in Rs 10,000 an dawng. Psycho Freaks leh Team Alpha ten Participation Prize Rs 5000 ve ve an dawng bawk.

Final zana khel tha ber "Fighter of the Night" atan Ch.Yachamba Meitei, Armed veng Warriors chu  thlan a ni a, TFL3 pumpui a Best Fighter atan Vanlalmawipuia, Armed Veng Warriors thlan a ni. Cadet Best Fighter atan Vannunmawia, Zopa Goldsmith Chawnpui chu thlan a ni bawk.

TFL3 final zanah hian League main sponsor GIG Motors neitupa Pu John Lalpeka leh MATA President Dr.Rualkhuma Colney ten thu an sawi a. Khualzahawm Pu Robert Romawia Royte hian Champion team Armed Veng Warriors te chu thilpek hlu tak a pe bawk.

Attachment

  • Loading attachment...