Sawrkar laipui Ministry of Social Justice and Empowerment hnuaia ALIMCO ten pianphunga rualbanlote tana hman tangkai tur chi hrang thahnem tak chu vawiin khan Social Welfare Minister Pu P.C. Lalthanliana’n Gilead Special School , Falkland veng ah a hlan.

Hlanna inkhawm tawite buatsaih hi Pi Zokhumi Vankung, Chairperson Spastic Society of Mizoram in a kaihhruai a. Minister chuan tanpui ngaite tanpui hi hmangaihna vawrtawp a ni a, mihring puite laka rawngbawlna anih piah lamah Pathian rawngbawlna anih hi a hlutna zawk chu a ni a ti a.He school a zirlaite chu rilru beidawng lova heng hmanrua te hmang tangkai a taksa leh rilru a rual el turin a fuih a ni.

Pu P.C. Lalthanliana chuan he school hostel in an mamawh em em chawchhumna tur Cooker lian leh fridge te a pek tur thu a hrilh nghal a ni.

ALIMCO hi pianphunga rualbanlo tana hmanrua hrang hrang ngaigtuahtu pawl changtlung tak a ni a, tun tumah Gilead Special School atana an pek te chu wheel chair 70 ; zak hawlh tiang (crutch) chi hrang hrang-100; bengdar chi hrang hrang -100 leh nizung chakna hmang a eng hmang chi battery lian te an ni.

He hunah ah hian Spastic Society of Mizoram Vice Chairman, Parliamentary Secretary Pu Lal Thanzara te chhungkua pawh an tel a. Pu Lal Thanzara hian hetiang rual banlo enkawlna hmun Shalom Special School, Serchhip ah tanpuina tangkaifai Rs. 30,000/- chu tun hnai khan a pe tawh nghe nghe a ni.

Kum 1989 a din tan Spastic Society of Mizoram hian pianphunga rualbanlo naupang tanpui hna an thawk thin a, Gilead Special School hi 1990 khan mimal In luah a bul tanin tunah hian Falkland veng chhunga mi inphal pakhat ramah anmahni pual hian School an nei mek a. Mimal in pakhat dang Hostel atan luah hawhin naupang 33 an awm a. School zirlai zawng zawng 200 chuang leh zirtirtu leh thawktu dang 43 an awm a ni.