Thir siamchhuahna hmunpui tur leh industry changtlung Mizorama awm hmasa ber tur Mizoram Iron Steel Plant Industries (ISPAT) chuan hna 99% in an inpeih tawh thu sawiin, ‘Tunah hian electricity chu nei tawh ila chuan, kar khat chhungin enchhin hna kan tan thei tawh a ni,’ tiin Roshan Agarwal, CEO, ISPAT chuan chanchinbumite a hrilh.

June 2 (Inrinni) khan Lengte rama ISPAT Factory hi Aizawl chanchinbumi thenkhat ten an tlawh a. ISPAT hotute chuan hna an thawh vat theih chuan thir tha man tlawm zawkin zoram mipuite’n lei tur an nei dawn niin a sawi , Industry Director chu ISPAT ram hawh tir chungchangah guarantor-ah emaw witness ah emaw a tan an hriat loh thu sawiin land lease chu kum 25-ah tihhniam a nih thu an sawi bawk.

ISPAT lam chuan tunah hian current line lian lakna tur an neih loh thu sawiin sub-station tur chu an bun tawh a, current pek an nih loh avangin hman theih a nih loh thu an sawi a. He sub-station hi ISPAT awmna Lengte atanga km 8 a hla niin an sawi a; tunah rih chuan domestic line pakhat leh generator 100 KVA an hmang a ni. ISPAT panna kawng hi siam that a la ngai hle a, hemi thawk tur hian sawrkar-ah an thlen tawh thu leh khaw that deuh hun chan a ngaih tur thu an sawi bawk a. ‘Pollution leh electric atangin inspection neih a ni tawh bawk a ni,’ tiin ISPAT chuan Inrinni khan helai hmun tlawha kal chanchinbumi 12 te chu an hrilh bawk a ni.

Kan thir siam chhuah tur hi 50% thirchhia leh thir tharlam Durgapur, West Bengal atanga lakchhoh inpawlh tur a ni a, hei vang hian thirchhia hi recycle theih a ni, a ti. He sumdawnna hi Mizote’n luhchilh se a duh thu a sawi a. ‘Keini chuan thirchhia hi a quality a zirin Rs 20- Rs. 25 in kan lei a, tuna thirchhiaa sumdawnnaah hian Mizo chhungkua hlawk pakhat mah an awm lo,’ tiin ISPAT lam chuan an sawi a. Thirchhia metric ton 1500 lai an leikhawl tawh a ni. Hnalak chungchangah skilled 60 leh unskilled 60 lak an nih tur thu ISPAT hruaitute chuan sawiin Mizo duhsak an nih tur thu an sawi bawk. ISPAT hian nitin thir tonne 90 a siam thei dawn a, TMT bar, MS Angle, square bar leh flat iron te an ni.

ISPAT Factory hi a dung metre 300, a vang metre 60 a ni. Kum 2010 April-ah Industry Department-ah dilna an thehlut a, 2010 December khan Rs. Nuai 15 sengin lease allotment pek an ni. Kum tin a hmun hawh manah Rs. Nuai 1.8 an chawi, P&E hnenah power security Rs. Nuai 65 an pe a. NEDFI leh SBI, Guwahati atangin loan cheng vaibelchhe 20 an la niin an insawi. ISPAT neitu share neih dan chu: Agarwal group in 65%, Baid hovin 33%, C.Lalduhawma, Ramhlun Veng 1% a ni.

Media mite hi Pu David L.Thangliana, Deputy Director DIPR hovin an kal a ni.