3289/2024-2025

Champhai, 29th November 2024: Vawiin khan General Nursing & Midwifery (GNM) School, Champhai chuan a ṭum khatna atan Capping & Lamp Lighting Ceremony an hmang a. Dr. Vanlalsawma, Principal Director, Health & Family Welfare Department chuan khuallian niin he hun hi a hman pui a, Pi Lalchhanhimi, Joint Director (Nursing) chu khualzahawm a ni.

Khuallian Dr. Vanlalsawma chuan thu sawiin, Champhai GNM School-in Capping and Lamp Lighting Ceremony hun an hmang thei chu Champhai khua leh District tan ni chhinchhiahtlak tak a ni, a ti a. Zirlaite chu zirtirna leh fuihna an dawn zawng zawng te hre reng turin a chah a. Nurse-te chu damlote ngheng hnai ber tu an nih angin damlo enkawl kawngah an pawimawh ber a ni, a ti bawk.

Health & Family Welfare Department Principal Director chuan sawi chhunzawmin, Nurse ṭhat leh ṭhat loh chu damdawiin hmel lanna pawimawh tak a ni, a ti a. Damlo ten hmangaihna leh ngaihsakna nena enkawl an thlahlel tak zet tih sawiin zirlaite chu harsatna karah pawh an zir thiamna te a taka hmang chhuak thiam turin a chah a. Fak tlaka hna an thawh ngei theih nan duhsakna sang ber a hlan nghal bawk a ni.

Khualzahawm Pi Lalchhanhimi chuan thu sawiin GNM School Champhai din theihna tura thawktu zawng zawng te zahna chibai a buk a. Zirlaite chu an thiamna te ṭangkai taka hmang tura fuihin, damlo te tan a malsawmna ni tur leh thawktu dangte puitu nih tum ṭheuh turin a fuih bawk.

He hun hi Pi Vanlalrengliani, Tutor chuan kaihruaiin, Pi Lalengzami Fanai, Principal hnen aṭangin GNM School din chhoh dan report ngaihnawm tak ngaihthlak a ni a, zirlai nu leh pa te hnen aṭangin thusawi ngaihthlak a ni bawk. Dr. PC Lalhmingliana, Sr. CMO leh Dr. Zatluanga, District Medical Superintendent te chuan zirlai tiṭhate hnenah chawimawina an hlan a, Pi Lalduhthlani, Tutor in lawmthu sawiin hun a khar a ni.

Pi H. Vanlalhluni, Nursing Superintendent, Champhai District Hospital chuan Capping & Lamp Lighting Ceremony a kaihruai a. GNM Champhai 1st leh 2nd Batch zirlai 38 te lukhum khum tirin, khawnvar a chhit tir a, thu tiam an sawi rual nghal bawk a ni.

Nurse zirlaite lukhum inkhumtir (capping) hian inpekna, thuawihna leh tumruhna a entir a, khawnvar chhit (lamp lighting) hi Modern Nursing bulṭantu Florence Nightingale hriatreng nana buatsaih niin damlo leh mangangte tana mei eng, damna leh beiseina thar a entir bakah hmasawnna leh thiamna sang zawk nei zel tura ṭan laknate, malsawmna leh midangte tana rawngbawl tura inpekna leh intiamnate a entir a ni.

GNM Nursing School hi October ni 10, 2023 khan bul ṭan a ni a. Tun dinhmunah zirlai batch hnih an lut tawh a, zirlai 40 awm mekin, Principal hovin thawktu 12 (Tutor 3, Casual Teacher 1, Warden 1, UDC 1, LDC 1, IV Grade 4) an awm mek a ni. Mizoram Nursing Council (MNC) in GNM Result a tihchhuah hnuhnung berah khan Top 10 ah zirlai 2 an lang a, first division-ah mi 10 langin mark za zela 70% chunglam an hmu vek a, letter hmu zirlai 4 an nei bawk a ni.

GNM Academic Building hi kum 2015 khan cheng nuai 288.73 senga sak zawh a ni a. Zirlai 40 te len theihna tur Hostel Building chhawng li a sang sak mek niin, he mi atan hian CSS leh SASCI aṭangin cheng nuai 371.95 hmuh a ni a. Building hi January 2025 ah hawn theih beisei a ni.