3288/2024-2025

2024 Sahmulphah thla ni 29: Vawiin khan Lunglei District Consultative Committee (DCC), District Level Review Committee (DLRC) leh District Level Security Committee (DLSC) chu an Chairman, District Bawrhsap Pi Navneet Mann hovin Lunglei DC Conference Hall-ah an ṭhu khawm.

Chairman Pi Navneet Mann chuan member-te lawmna thu sawiin, bank-te chu mipui rawngbawltu pawimawh tak, sawrkar scheme hrang hrang hlawhtlinna atana pawimawh an nih angin theih tawp chhuah zel turin a chah a. Bank-te leh sawrkar line department hrang hrangte chu District hmasawnna tur leh mipuite tan ṭha taka thawk ho zel tur te, bank kal tlanga hamṭhatna scheme hrang hrang awmte pawh mipuite hnenah uar zawka puangzar zel tur te'n a chah bawk.

He ṭhut khawmah hian Lead District Manager Pu R. Lalmalsawma leh Manager & Lead District Officer RBI Aizawl Pi Ruth Paumunmuang te bakah, bank hrang hrangte, line department-te, Sub-Headquarters YMA leh Sub-Headquarters MHIP ai awhte an tel a ni.

He hunah hian DCC meeting hmasa meeting minute chu pawm a ni a. Kum 2024 July thla aṭanga September thla (2nd Quarter, 2024-25) chhunga Lunglei District-a bank hrang hrangte hna thawh thlir let niin, hmachhawp an neih leh hma lak zui dan tur te sawi ho nghal a ni.

He hunah hian zero balance-a account hawn theihna Pradhan Mantri Jan Dhan Yojana (PMJDY) leh Social Security Scheme hrang hrang - Pradhan Mantri Jeevan Jyoti Bima Yojana (PMJJBY), Pradhan Mantri Suraksha Bima Yojana (PMSBY), etc. te thlir ho niin, he'ng scheme-ah te hian hma sawnna hmuh a nih thu tar lan a ni a. PMJJBY leh PMSBY bika ni 15.10.2024 – 15.01.2025 chhunga 3 months saturation campaign kalpui mekah  November ni 18, 2024 thlengin Lunglei District chhunga target khaw 113-ah khaw 66 tuam chhuah tawh niin, PMJJBY-ah target 847-ah 783 (92.44%) leh PMSBY-ah target 909-ah 1,021 (112.32%) enrollment hmuh tawh a ni.