3287/2024-2025

Saitual, the 29th November 2024: Vawiin khan Keifang Centenary Sport Complex, Saitualah naupangte pualin “Children’s Day Festival 2024” hman a ni a, Prof. Lalnilawma, Minister of State chu khuallian niin hun a hmanpui.  

He hunah hian Minister Prof. Lalnilawma chuan thu sawiin Saitual chu Mizorama district pum huapa naupangte puala hun hmang thei awm chhun district an ni chu lawmawm a tih thu a sawi a, district officers te thawhhona thatzia a lang tih a sawi. Minister chuan November 14-a “Children’s day” leh November 19-a “ World Day for the Prevention of Child Abuse” te chu remchan zawkna avangin vawiinah hun hman a ni a ti a, kalkhawmte chu he hun an hman chhan naupangte dikna chanvo humhalh te, zirna kawnga hma an sawnna tur ngaihtuah te, naupang chunga hlemletna tihtawp tura hmalak te, naupang chanhai zawkten nu leh pa an neih theih nana hmalak te chu hre thar leh turin a chah a ni. Prof. Lalnilawma chuan DCPU hmalak tawhna hrang hrangte a tarlang a, NMBA kal tlanga ruihhlo that lohzia inzirtirna kalpui mek a ni bawk tih a sawi. Naupangte chu ruihhlo laka fihlim tlat turin a fuih a, hlim taka hun hmang turin a duhsakna a hlan nghal a ni. 

Khual zahawm District Bawrhsap Dr. Lalngura Tlau pawhin thu sawiin, naupangte hi ram hruaitu tur leh ram nghah fakte an ni tih a sawi a, hemi vang hian naupangte chu hlim leh hrisel taka an than len a pawimawh a ni, a ti. Bawrhsap chuan District chhunga naupang harsatna nei te tan sawrkar a awm reng tih a sawi a, DCPU te leh DHEW te chuan naupang humhim kawngah hma an la reng tih a sawi. Dr. Lalngura Tlau chuan Children’s Day Festival hlawhtling tak an hman theih chhan chu department hrang hrang thawhhona rah a ni tih a sawi a, thawhhona tha tak an neih zel a beisei tih a sawi bawk. Naupangte ruihhtheihthil tel loa hlim taka hun hmang turin duhsakna a hlan nghal a ni. 

World Day for the Prevention of Child Abuse & Adoption Month denchhenin tlangau intihsiakna neih a ni a, Saitual Chawnpui Branch YMA chu pakhatna niin, Rulchawm Branch YMA chu pahnihna an ni a, pathumna hi Saitual Venglai Branch YMA te niin, Children’s Day Festival-ah hian lawmman sem nghal a ni.  

Naupangte puala hun hmannaah hian Pu James Lalthangmawia, District Child Protection Officer, Saitual chuan inlawmna thu a sawi a, Minister Prof. Lalnilawma leh District Bawrhsap Dr. Lalngura Tlau chuan thu sawiin, tlangau intihsiak lawmman sem nghal a ni. Children’s Day Festival 2024 hi District Child Protection Unit (WCD), Nasa Mukt Bharat Abhiyaan (DC Office), District Hub for Empowement of Women (WCD), District Education Office te tangkawp buatsaih a ni a, he hunah hian nilengin naupang infiamna leh intihhlimna chi hrang hrang a thlawn veka hman tur a awm a ni.