3286/2024-2025

Dated Kolasib the 29th November 2024: Vawiin khan DC Conference Hall ah Krismas leh Kumthar him leh ralmuang taka hman a nih theih na tura ruahmanna hrang hrangte sawikhawm turin Kolasib a Sawrkar hotute leh NGO leh kohhran hruaitute an thukhawm a, he thuthkhawmna hi Kolasib DC Pu Robert C Lalhmangaiha chuan a kaihruai a ni. 

Vawiin thuthkhawmna ahhian venhimna chungchang leh Krismas leh kumthar vuakvet a halpuah leh halmawi hal khap na kalpui dan tur chungchangte ngaihtuah ho niin, Sawrkar leh pawl hrang hrang ten hma an lo lak tawh dan leh an in ruahmmanna kal mek te sawiho a ni.

Thuthkhawmna kaihruaitu Kolasib DC Pu Robert C Lalhmangaiha chuan tun hnaia Diwali leh Dussehra hman zawh taka halpuah leh halmawi khapna dan thuawih taka zawm a ni chu a lawmawm hle a ni, a ti a. Kan hma lawka Krismas leh Kumthar lo thleng turah pawh heng hal chi, mihring hriselna khawih pawi thei laka fihlim turin kalkhawmte chuan theihtawp an chhuah a ngai a ni, a ti. Kolasib DC chuan Halpuah leh halmawi chi chu Sawrkar in a phalloh mai bakah hriselna tan a hlauhawm a, kum upa leh hriselna chaklo te a tuartu ber an nih avangin theihtawp a khuahkhirh a tul a ni, a ti a. Hriselna piah lamah heng thil hian sahawkna a keng tel a, kangmei thleng in a thlen theih avangin tlawmngai pawl hrang hrang kalkhawmte leh sawrkar hotute chu anmahni hmun theuh ah thahnemngai  taka duty turin a ngen bawk.

Kolasib SP, Pu David H Lalthangliana pawh in Police Department lam atanga an inpuahchana kal mek chungchang a tarlang a. SP chuan a tam thei ang bera mobile duty neih a, khawtlang leh VDP te nen tangho a hmalak an tum thu a sawi. December thla a Vehicle -Zero Tolerance Drive an neih tur pawh theihtawpa mipuiten thlawp turin a ngen nghal bawk a ni.

He hunah hian Tlawmngai pawl leh khawtlang hruaitute chuan kum danga an kalpui tawh thin dana hmun hrang hranga duty in dah chu kumin ah pawh chhunzawm an tum thu an sawi a. Kohhran hruaitu aiawh kalkhawmte pawh in a tul anga sawrkar hmalakna chu thlawp an tum thu an sawi bawk. 

Vawiin thuthkhawmna ahhian Kolasib DC leh SP bakah Kolasib, Vairengte leh Bairabi civil SDO te, Excise Assistant Commissioner te, Kolasib District hmun hrang hranga Joint VC aiawhte, Gurkha Association aiawhte, MUP aiawhte,Kohhran hruaitu aiawhte leh sawm bik mi pawimawhte an tel a ni.