3285/2024-2025

2024 Sahmulphah thla ni 29: Vawiin khan village council inthlanpui lo awm tur puala electoral roll en nawnna (revision) kalpui mekah Lunglei District-a village level officer (VLO)-te tan Convention Centre, Lungleiah training buatsaih a ni.

He hun hi Election Officer Pi R. Lalrinzuali'n a kaihruai a. Master Trainer, Sub-Deputy Commissioner Pi Lalhlimpuii Pachuau chuan training hi pein, VC electoral roll en nawn kalpui tura VLO-te tih tur leh hriat tur pawimawh hrang hrang a sawi fiah a. Hming thun thar, hming paih, siam ṭhat leh awmna hmun sawn nana form hman tur hrang hrang te, a hman dan tur leh roll-a chuang thei chin te leh roll revision kalpui dan tur te zir ho niin, zawhna leh chhanna leh sawi hona hun hman a ni bawk.

He training-ah hian form hman tur chi thum - Form 3 (kum tling thar thunna bakah, VC constituency hrana awmte'n an awmna hluia mi paih a, tuna an awmna constituency-a inziah luh an dilna), Form 4 (mitthi bakah non-tribal paih tur an nih anga paih dilna) leh Form 5 (siam ṭhat ngai siam ṭhat dilna) te hman dan tur a taka zir ho a ni a. Tun ṭuma VC/LC roll siam thar turah hian India khua leh tui, scheduled tribe, January ni 1, 2025-a kum 18 pum hlum tur chin, constituency chhunga ni 180 tal lo khawsa nghet  tawhte chauh thun theih a nih thu tar lan niin, ni 26.01.1950 leh a hma lama Mizorama cheng Gorkhali-te leh an thlah (direct descendant)-te erawh chu VC/LC roll-ah hian an tel thei tih tar lan a ni. 

Vawiin training-ah hian Lunglei District chhunga village council 88-a VLO mi 117 an tel a. Lunglei Municipal Council Secretary leh SDO(C) Tlabung te'n he training hi an telpui bawk.