3284/2024-2025

AIZAWL; the 29^th November, 2024: Vawiin chawhma dar 10:30 khan MAL(Mizo Academy of Letters), kum 60 tlin( Diamond Jubilee) lawmna inkhawm Pi Zaii Hall, Synod Conference Centre-ah nei a ni a.  Art & Culture Minister Pu C.Lalsawivunga chuan khuallian niin Jubilee lawmna inkhawm  programme a hman pui.

Jubilee lawmna inkhawmah hian thu sawiin, khuallian Pu Lalsawivunga chuan MAL hi Mizo thu leh hla tih hmasawnna kawnga thawhhlawk em em a ni a. Vawiina Diamond Jubilee hial kan lo lawm thei hi ropui ka tiin, Mizo tawng leh Literature tana kan missionary te lo thawhhlawk zia te a tharin min hriat chhuah tir a. Kan mithiam  leh ram hruaitu hmasa ten Mizo tawng humhalh leh tihhmasawn nana rilru an lo sen nasat zia hi MAL an lo din a, kum 60 hmel hian kan lo hmu thei mai hian a tarlang hle in ka hria a. Vawiinah hian kan missionary  te, kan mithiam te leh ram hruaitu hmasa te  hnenah Diamond Jubilee pual zahna leh lawmna chibai ka hlan a ni,  a ti. Khuallian chuan Mizo Academy of Letters member te chu Diamond Jubilee pual  lawmpuina leh duhsakna hlanin, Mizo thu leh hla  chawinun leh tih hmasawnna kawnga an hmalakna chu Art & Culture Minister a nihna ang pawhin a thlawp tlat tur thu leh a sawi bawk. 

Minister hian Jubilee pual Lehkhabu leh lehkhabu dang mi 4 ziah a tlangzarh a,Jubilee  puala (Poem,Article, short Essay leh short Story) inziahsiaknaa lawmman  te a sem nghal bawk.

Jubilee lawmna programme hi Chawhma inkhawm leh Chawhnu Inkhawm a thenin, Chawhma inkhawm hi Prof. RL. Thanmawia, President, Mizo Academy of Letters, General Headquarters chuan kaihruaiin, Rev. Dr. Zaihmingthanga,Member, MAL,General Headquarters chuan hunserh a hmang a. Prof. Rualkhuma Colney, Vice President, MAL, General Headquarters chuan kalkhawm te lawmna thu a sawi.

Dr.Zoramdinthara,General Secretary leh NI.Lalsangpuii,Treasurer  ten kum kal ta kum khat chhunga MAL hmalakna leh sum hman dan report an pe a. Pu F. Vanlalrochana Secretary, (Chhuahtu leh Tlangau Committee) chuan Power Point Presentation hmangin kum 60 chhunga  MAL zinkawng chanchin a entir.

Prof. Laltluangliana Khiangte,Donor Member, Mizo Academy of Letters chuan Jubilee Hlado a chham a, Dr. C. Lalawmpuia Vanchiau chuan Jubilee lehkhabu thlirlawkna hun a hmang a, a sawi a. Chawhma programme-ah hian MAL member 6 sunna leh hruaitu hlui chawimawina hun pawh hman a ni a.

Pu Lalhmingmawia Ralte, Fin. Secretary, Mizo Academy of Letters chuan lawmthu sawiin chawhma programme chu a titawp ta a ni. Lalduhsaki leh Sangtei Khuptong ten Chawma inkhawm an awi a ni.

Chawhnu inkhawm hi Prof. Rualkhuma Colney,Vice President, MAL chuan kaihhruaiin,Jubilee chibai bukna hun  Pu Lalzuia Colney, Pu C. Chhuanvawra leh  Pu B. Lalthangliana  ten an hmanga a.

Dr. R. Zothanliana,EC Member, MAL leh Dr.H.Laldinmawia,Asst. G.S., MAL ten ziak mi 7 leh Thangthar ziak mi 9 te kawmna hun an hman zawhah Jubilee kilho nghal a ni.