3283/2024-2025

Aizawl, the 29 November 2024: Vawiin chawhma dar 11:00 khan Health & Family Welfare Minister Pi Lalrinpuii chuan Indian Medical Association (IMA), Mizoram Branch Annual Conference vawi 47-na, Aijal Club-a buatsaih chu Khuallian niin a hmanpui.

Khuallian Health & Family Welfare Minister Pi Lalrinpuii chuan Doctor mamawhna chu khawvel ram tinah a san em em thu sawiin, IMA Conference chu mipui rawng an bawlna kawngah hlawk thlak taka hmang turin a chah a. Doctor-te chu sawrkar pawhin a duhsak hle tih sawiin, rawngbawlna rilru an pu chu ropui a tih tak zet thu a sawi a. Health Minister chuan Mizoram chhunga Health Department-in mipui hriselna atana hma a lak dante tarlangin, ram pum chhut pawhin Mizoram chu mipuite hriselna kawnga hma la nasa ber a nih dante a tarlang bawk a. IMA member-te chu ruihhlo leh mipat hmeichhiat hman khawlohna leh hemi avanga natna inkaichhawn theihte dona kawngah sawrkar tha tichak tura sawmin, a hlawk thei ang bera conference hmang turin duhsakna a hlan nghal bawk a ni.

Vawiina hun hman hi Dr. Rosangluaia, President, IMA Mizoram Branch chuan kaihruaiin  kalkhawmte lawmna thu a sawi a. Dr. Chawnglungmuana'n IMA chungchang leh hmalakna kallaite report pein, IMA member boralte sunna hun hmanin a zui a. Hemi zawh hian Dr. Malsawma kaihhruaiin IMA member-te chuan thuthlung an sawi rual a, Dr. Vanlalchama, Assistant Secretary, IMA Mizoram Branch  chuan lawmthu sawiin hun hman hi a khar a ni.

Attachment

  • Loading attachment...