3582/2024-2025

Dt 29.11.2024 Zirtawp Ni : Nimin khan Parliamentary Committee on Railways meeting, Parliament Annexie building Committee Roomah neih a ni a. He meeting hian India ram puma Railways Bridge (lei dawh), tunnel (lei verh), railway lei motor kawngpui in a tantlang chungchangte an thlir ho a ni. Mizoram Rajya Sabha MP Pu K. Vanlalvena chuan Sihhmui Railway bridge siam lai nikum a a chim thu te, chumi avanga kum khat lai hna thawh chhunzawm lova chawlhsan a nih thu te, kumina zawh tura ruahman chu thawh zawh hman a nih tak loh thu te, tun anga an thawh muan reng chuan nakum 2025 ah pawh zawh a nih dawn loh thute sawi chhuakin; chak zawka hna thawh a nih theih nana hmalak a tul thu a sawi chhuak a ni.

Tun dinhmunah India ram pumah Railway lei (bridge)163810 a awm mek a. Chung zinga bridge 11918 te chu kum 2014 leh 2024 kum sawm chhunga dawh thar te niin a siam nan cheng vaibelchhe 8208 hman ral a ni a. Lei verh hmun 540 ah awmin a thui zawng belh khawm chu KM 199.96 a ni bawk a. Rail kawng leh motor kawng in tantlang na hmun 17998 ah awm mek in heng Railway leh Highway intan tlangna hmun zawng zawng ah hian lei dawh vek tura ruahmanna siam a ni bawk.

North East Frontier Railway tawpna hmun ni tur Sihhmui Rail Station siam mek chu nakum 2025 ah zawh tura ruahman niin he hna kal lai mek a hmuna endik tur hian Pu Vena ngenna bawhzuiin Parliamentary Study Team te Mizoramah rawn kal tura ruahmanna siam a ni.

He meeting hi Parliamentary Committee on Railways Chairman Pu CM Ramesh an kaihruaiin MP engemawzat leh Railways Official te an tel a ni.