3581/2024-2025

Dated Lawngtlai, 29th November 2024 : Nizan khan International Chin Christian Youth Conference (ICCYC) Inkhawmpui vawi - 2 na chu Chandmary Recreation Centre, Lawngtlaiah neih a ni a. Pu Lalduhoma, Chief Minister chuan khuallian ni a hmanpuiin, ICCYC Inkhawmpui  hawnna a nei.

Pu Lalduhoma chuan ICCYC Inkhawmpuia khuallian tura sawm a ni chu lawmawm a tih thu sawiin, kalkhawmte chibai bukna a nei hmasa a . ICCYC Inkhawmpui thupui ' We are One' hian inpumkhatna kawng hnihin a tarlang a, chu chu politics leh rinna lama inpumkhatna hi a ni, a ti. Min thlahtu kan pi leh pute khan Mizoram leh a chheh vel luahin, Lal neiin tlang dang dangah khawsa thin mahse, inpumkhatna tha tak  an neih thin  thu a sawi a. British sawkarin  Mizoram an awp hnua  an thil hriat chian em em chu Zohnahthlakte chu thisen inzawm, thlah khat, chhulkhat chhuak an nihna hi a ni tiin rorelna pakhat hnuaia awm turin Chin- Lushai Conference chu Fort William, Kolkata, ah kum 1892  khan neih a ni, a ti. He Conference - hian Chin- Lushai te thlahkhat an nih thu pawmin,  hmun khata awm turin an ti a,  amaherawh chu harsatna hrang hrang avangin tlang dang dangah kan lo awm ta ni,  a ti.

Chief Minister chuan Lushai, Chin leh Kuki tih hi hnamdangin  hming min phuahsak mai mai a nih thu a sawi a. Kum 1988- a Zo Reunification Oraganisation (ZORO) a lo ding a, Champhaia  'Wold Zo mi  Conference' hmasa ber neih a nih khan Zohnathlak zawng zawngte hming intawm turin 'Zo' tih thlan a lo ni tawh  a ti a.  Chhul khat chhuak kan nihna avanga inpumkhatna lam hawi tur kan nih laia U leh nau kara in hmuh thiamlohna awm thin chu pawi a tih thu sawiin Pu Lalduhoma chuan inpumkhatna lam hawi a tul tawh tak zet a ti. Rei tak chhung tlang dang danga  awm hrang lo nih tawh avang a mihrang leh hnam dang ang a in enna awm thin chu sim a  hun tawhin, inpumkhat leh tura theihtawp  chhuah a  tul thu a tarlang a. Chief Minister chuan inpumkhatna awm tura mimal taka theihtawp a chhuah  thin thu sawiin, USA ah ngei pawh he inpumkhatna thu a sawi tawh tih a tarlang.

Khuallian chuan Mizoram chhungah Myanmar, Manipur leh Bangladesh atanga Zohnahthlak raltlan tam tak an awm mek thu a sawi a. Sawrkar ang pawhin  theihtawpa Raltlante   chhawmdawl mek an nih  thu a tarlang a. Hei hian politics lama inpumkhatna thui tak a hril a ni, a ti a.  Kohhran ang zawng pawha inpumkhatna awm  a pawimawh thu tarlangin,  Kohhran hrang hrang pariat ten  thawkho tura 'Council of Churches in Mizoram'  an lo din ta chu thil lawmawm tak a ni, a ti. Chief Minister chuan hmalam hunah pawh Kohhran huangchhung  chauh ni lo a, Zohnahthlak  hnam hrang hrangte inkarah  inpumkhatna tha zawk a awm thuai a beisei tih  a sawi a. Khawvel ram hrang hranga Zohnahthlakte inpumkhat turin mitinin mawhphurhna an neih thu tarlangin, Pu Lalduhoma chuan tisa  leh thlarau  lama inpumkhatna tluantling awm tura theihtawp chhuah turin kalkhawmte a sawm nghal bawk.

Nizan International Chin Christian Youth Conference (ICCYC)  Inkhawmpui vawi - 2 na hawnnaah hian Rev. B. Zazawna Lai, chuan kalkhawmte lawmna leh inhmelhriattirna hun a hmang a ni.