No.1238/2021-2022
Kolasib Dated 3rd July 2021 : Vawiin chawhma dar 10:00 khan Golgotha Camping Centre-a awmte tan COVID-19 Vaccine pek a ni. Ruihhlo ngaite puala Centre siam Golgotha Camping Centre, Vairengteah hian May ni 29 2021 khan CMO Kolasib hmalaknain COVID-19 Rapid Antigen Test leh TrueNat Test kalpui a ni a. Hetah hian COVID-19 Positive mi 56 lai hmuhchhuah a nih avangin Golgatha Camping Centre hi Containment Zone a puan a ni tawh a. Sawrkar leh Medical lama thuneitute chuan Golgotha Centre a awmte dinhmun zirchiangin, helai hmuna awmte hian COVID-19 Vaccine hi kalphung pangngai anga la thei turin Documents pawimawhte an neih tawh lo thu hriat a ni a. Sawrkar lama thuneitute leh Medical lama hotute chuan COVID-19 Vaccine an lak ve ngei theih nan ruahmanna an siam a. Vaccination Certificate pawh an siam sak thei dawn bawk a ni.

Vairengte Community Health Centre a thawktuten Golgotha Camping Centre a awmte hi Vaccine pe turin a hmunah an pan a. Dr. P. Zorinsanga, Medical Officer hovin Vaccination Team-te hi an kal a ni. Vawiin a Vaccination kalpuinaah hian COVID-19 la Positive ve lo mi 43 hnenah chauh Vaccine pek hrih a ni a. Positive mi 56 te hi CCC-ah dam taka enkawl tawh ni mah se mithiamte rawn angin, COVID-19 hri laka an fihlim atanga thla thum (3) a ral hnuah Vaccine hi pek theih an ni dawn a ni.

Golgotha Camping Centre hi kum 2010 khan ‘Thuchah Hnuhnung Puangtu Team’-te din niin, Pathian thu a inchiahna hmun atan hman a ni a. Kum 2018 atang khan ruihhlo ngaite enkawlna in atan hman chhoh tan niin, tun dinhmunah Golgotha Camping Centre-ah hian mi 93 enkawl mek an ni.