No.1239/2021-2022

Dated Champhai, the 3rd July, 2021: A bial chhung Champhai South A/C chhung veng leh khaw hrang hrangte tlawhkuala Champhai chamchilh mektu, Law & Judicial Minister Pu T.J. Lalnuntluanga chuan vawiin khan Sub-Hqrs. YMA (SYMA) Champhai buatsaih Zirlai tithate leh mi tlawmngaite chawimawina hun SYMA Pisa, Tlangrawta neih chu khuallian niin a hmanpui.

Law & Judicial Minister Pu T.J. Lalnuntluanga chuan SYMA buatsaiha zirna kawnga mi hmingtha leh midangte tana nunna thapa inpe mi tlawmngaite chawimawina hun buatsaih a ni chu lawmawm tiin, midangte zirtirtu ni thei se a duh thu a sawi a. YMA chu tanpui ngaite tanpuitu, chhiat thata mi lian leh te thliar chuang lova thlamuana awmpuitu, mi chitinte enhrang lo leh chawimawi phute chawimawia ti phurtu a nih thu tarlangin, nu leh pa chan chang an nih angin ram leh khawtlang tan theihtawp an chhuah thin a ni, a ti. A enkawl Transport department chuan Sub-Hqrs. YMA Champhai nen thawhdunna thuthlung siamin Recovery Van leh Ambulance-te SYMA Champhai hman hawhtir tuma ruahmanna siam a nih thu a sawi a. Oxygen Concentrator pawh remchang hmasak berah ngaihtuah sak a tum thu a sawi bawk.

Kan ramin a mamawh ber chu ngaihtuahna dik neih hi a ni a, mimal leh pawlin an hlawkpui tur vantlang tana hmasawnna ruhrel lian tham ni lo siam ai chuan mipui vantlang leh khaw pumin kan chhawr tangkai theih tur leh intawm theih hlawm lian zawk siam turin ngaihtuahna sen a tul a ni, Law Minister chuan a ti a. Ngaihsan zawng thlak ngam a tul thu leh hnathawh leh thil tih that leh that lohah inel a finthlak zawk thu sawiin, YMA chu mipui rilru sukthlek leh ngaihtuahnate siam tha tura theihtawp chhuah thin turin a ngen a. Thluak leh tha tangkawp chunga hmasawnna kawng zawh tura pen chhuah a hun takzet tawh thu sawiin, Sub-Hqrs.YMA Champhai hnuaia zirlai leh mi hmingthate chu chhuanawm a tih thu sawiin, midangte tana entawntlak ni zel tura theihtawp chhuah turin a chah a ni.

Thusawitu dang SYMA Champhai President Pu F.Lalrinmuana chuan kum puan thupui zirna uar bawhzuinan YMA in tan a lak thu leh tunhma central service-ah mizo inziaktling an tam thin thu tarlangin, tunhnaia kan tling tam lo chu inbihchian a ngai a, hetiang a nih chuan  sawrkar fawng vuantu lianah mizote kan awm lo thuai ang tih a hlauhawm a ni, a ti a. Tuma chhuhsak theih loh thiamna chu ro hlu, ram leh khawtlang chhawr theih a ni tiin, kalkhawmte chu ngaihsan tur dik tak dikna leh rinawmnate ngaisang thar leh turin a sawm a ni.

He hun hi Pu T.Lalnunsanga, Chairman Kumpuan Sub-Committee chuan kaihruaiin, Pu K.Hrangdawla, Vice Chairman, Kumpuan Sub-Committee-in fuihna thuchah a sawi a. Pu R.Lallawmzuala, SYMA Secretary leh Pu H.Zirsangliana, Asst. Secretary, Kumpuan Sub-Committee-te hnen atangin report leh chawimawite chanchin tlangpui ngaihthlak a ni.

Vawiina SYMA buatsaih chawimawina huna zirlai chawimawite hi HSSLC Examination 2020-2021 a Mizoram puma top ten zinga mi  Esther Lalrinsangi D/o PC Lalzarliana, Champhai Vengsang Project Veng (Commerce 6th position),  Z.D Lalthlamuani D/o Z.D Malsawma, Champhai Vengthlang (Arts 9th position) leh  K.Vanlalruatpuii D/o K. Lalbiakdika, Champhai Vengthar (Arts 10th position) te, Doctorate of Medicine (DM) Nephrology hmu thar  Dr. Malsawmkima S/o K.L Chhuma (L), Khuangleng leh Covid-19 hrikai damlo enkawltu neilo pitar a dam chhuah thlenga awmpui tura inpe Nl. C.T Ramnunmawii D/o Thanglûaia (L), Champhai Ruantlangte an ni.

Vawiin vek khan Law & Judicial Minister hian a bial chhung a mi HSSLC Examination 2020-2021 Arts top ten-a langpha K.Vanlalruatpuii D/o K.Lalbiakdika, Champhai Vengthar hnenah lawmpuinan laptop a hlan a, veng hrang hrang tlawhkualin zirlai hlawhtlinna changte thilpek hlan leh hri do kawnga  khawtlang mamawh semna hun a nei a. Zirlai hlawhtlinna chang lawmpuina thilpek hlante hi Dinthar Vengah mi 16, Electric Vengah 46, Bethel Vengah 71, Vengtharah 38 , Venglaiah 66, Zion Vengah 31 leh New Champhaiah 22, an vaiin mi 290 an ni a, lawmpuina lehkhabu Dictionary a hlan a ni. VLTF-te hnenah Hand sanitizer, Face mash bakah, Vawk pul hri laka invenna Sodium hypochlorite leh Chinai-te hlan niin,  Venglai leh Dinthar Veng khawtlang hruaitute hnenah Oxygen Concentrator a hlan bawk a ni.

Minister hi Pu Lalnunfela Chawngthu, SDO Sadar leh Dr. Lallawmkima, DIRPO Champhai ten an tawiawm a ni.