Govt. Champhai College Disaster Management Committee buatsaihin chhiatrupna thlen thula insenghawi dan lemchan vawiin khan College-ah neih a ni a. Champhai DC Pu Vanlalngaihsaka, IAS chuan a telpui. Nimin (25. 04. 2016) khan College Seminar Hall-ah hemi atan hian training programme buatsaih niin, DC chuan disaster management tha tak kalpui tur chuan training mumal neih a pawimawhzia a tarlang a ni.

Pu Vanlalngaihsaka chuan Mizo kan vanneihna chu chhiat tawh nikhuaah tlawmngaih chhuaha kalkhawm kan thahnem thin hi a ni a. Kan tlawmngaihna kan lantirna hi a tangkai zual zawk theih nan training tha tak neih a, chhan ngai leh puih ngai te awmze nei taka puihbawm dan tha zawk kan hriat hi a pawimawh dawn a ni, a ti. Tunhnaiah thli leh rial vanga Champhai District hmun hrang hranga chhiatna thlengte tarlang in, chhiatna tawk chhungkuate pui tura bialtu MLA-te thawhhlawkna leh District DM&R Branch hmalakna te DC chuan a tarlang tel bawk.

Mock Drill leh Disaster Management Training programme neih hi Pu. R. Lalchhuanawma, Working Chairman, Disaster Management Committee, Govt. Champhai College chuan kaihruaiin, Pu Lalnunmawia, Principal GCC leh Pu PC Zoramthara, District Coordinator, DM&R ten thu an sawi bawk a. Resource Person atana sawm Pu Lalngilneia Colney, DSYO leh District Adventure Association atangin Pu Lalfakzuala, Pu Lalhmachhuana leh Pu Lalramsanga ten zirtirna an pe a ni.

Vawiina Mock Drill neihah hian Champhai District Sports & Youth Services Office leh Adventure Association ten chhanchhuah dan "rescue operation" hrang hrang a taka entir in an zirtir bawk a ni.