4092/2024-2025

Dated Hnahthial, the 5th February, 2025: Government Hnahthial College Literary Festival, 2025 ni khatna chu vawiin khan an College Auditorium-ah neih niin Hnahthial Bawrhsap, Pi Rita Lalnunmawii Pachuau chuan khuallian niin a hmanpui a. 'Mizo History leh Sailo Lal Ropuite: Vandula leh Ropuiliani' lehkhabu chungchang Research team-te hnen atanga ngaihthlak niin MAL book of the year, 2023 - Pangparhnima ziaktu, Pi Ahmangaihi Khiangte kawmna hun neih a ni bawk.

Bawrhsap chuan tunlai, lehkhabu chhiartu tlakhniamna khawvelah ziak leh chhiar tuai thar leh tura Literary Festival buatsaih a ni leh a buatsaihtu, Literature Club din a ni te chu lawmawm a tih tak zet thu a sawi a. He huna ziakmi rawn kalte chu a hlut tak zet a ni tiin Hnahthial tana mi hlu leh ropui tak mai, Lalnu Ropuiliani chungchang Research neih a ni thei chu lawmawm a tih thu a sawi a. Hetiang hun hi buatsaih a harsa thin a ni tiin kalkhawm zawng zawngte chu hlawkthlak thei ang bera hmang turin a duhsak thu a sawi a. Literature hi kan vawn nun duh chuan a chhiartu kan awm a ngai a ni tiin ziakmi te chawm nun dan chu an thuziakte chhiar a ni a ti a. Lehkhabu chhiar hi awmhmun atanga hmun leh hun ropui tak tak min fan tirtu leh rilru tizautu pawimawh tak a nih avangin lehkhabu chhiar hi vawng nung zel turin kalkhawmte chu a sawm a ni.

He hunah hian 'Mizo History leh Sailo lal Ropuite: Vandula leh Ropuiliani' chungchang chu a lehkhabu ziaktute, Research team members - Dr. Laithangpuii, Asst. Professor, Dept. of History, Mizoram University(MZU); Pu Laltlanthanga Pautu, Research Assistant, MZU leh Pu Zirnuntluanga, Research Assistant, MZU bakah Pu Alfred Zothansanga Sailo, Exodus Research Consultancy Chairman te hnen atanga ngaihthlak niin kalkhawmte nen sawi hona (discussion) hun neih nghal bawk a ni.

Chawhma hun hi Dr. C. Vanengmawii, Assistant Professor chuan kaihruaiin Pu Lalsiamthanga, Principal, Govt. Hnahthial College (GHC) chuan kalkhawmte chibai bukna a nei a. Literary Festival chungchang report tawi, Pu C. Rodingliana, Secretary, Literary Festival Organizing Committee hnen atanga ngaihthlak niin Pi Catherine Lalrodingi, Asst. Professor chuan lawmthu sawinain chawhma hun hi a khar a ni.

Chawhnu hunah hian Pi Ahmangaihi Khiangte, Mizo Academy of Letters Book of the Year, 2023 - Pangparhnima ziaktu, kawmna hun neih a ni.

GHC Literary Festival hi Literature Club, Department of English leh Mizo tangkawpin a an buatsaih niin Club din tirh, 2023 atang khan kum tin Festival hi buatsaih thin a ni. Tun kum Literary Festival hi ni hnih awh tur niin a ni hnihna hi naktuk, February ni 6 hian neih a ni dawn a. Festival Concert anga neih tur niin zan dar 7 atanga zan dar 10 thleng Govt. Hnahthial College campus-ah zaithiam - J. Lalrosanga, Lilzoa, Deborah Ralte leh Mista Blow ten performance an nei dawn a ni.

Vawiin hunah hian Sub Hqrs Young Mizo Association (YMA) hruaitute, Denglung YMA-te, Village Council hruaitute, Mizoram Journalist Association (MJA) member-te, MZP hruaitute, ziakmi te, sawm bikte leh college zirlaite an tel a ni.