4091/2024-2025

Siaha the 5th February 2025: UD&PA Department buatsaih Mizoram Cleanliness Competition-a district headquarters category bika pahnihna nih lawmna chu vawiin chawhma dar 11 khan MADC Golden Jubilee Hall, Siaha ah neih a ni a, Pu Vanlalchhuanliana, SDO (S) leh DPO nibawk chuan he hun hi kaihruaiin MADC CEM Pu M Laikaw chu Khuallian a ni.

Khuallian Pu M Laikaw chuan kalkhawm mipuite, NGO aiawhte, Head of Office-te chu lawmthu a hrilh a, 2023 ah Mizoram puma khawpui fai inelnaa pathumna dinhmun Siaha in a hauh tawh hnuah Nikum 2024 ah pahnihna a ni thei chu hmasawnna ropui tak a ni a, lehpekah chuan pakhatna lawmman an lak theih ngei a beisei tih a sawi. Siaha khawpui faina kawnga thawhhlawk tak kawngpui phiatfaitu (sweeper) te inpekna leh thahnemngaihna chu fakawm a tih thu a sawi bawk. Fai intihsiaknaa Lawmman pahnihna an la thei chu State sawrkar leh District Council thawhhona that zia a langchiang hle a ti a, New Maraland vision an neih ang taka engkima hmasawnna Siaha in a neih zel theih nan Department hrang hrangte thawhhona tha nei zel turin a sawm. Khawpui a lo fai lehzual nan faina chu sawrkar kutah dah mai lovin, mahni mawhphurhnaah dah ngam theuh se, Chanchinbumite pawh uar lehzualin faina kawnga zirtirna pek chungchangah tan la lehzual turin a sawm bawk.

MADC a LAD changtu EM Pu K Chhuabei pawhin thu sawiin Siaha district in bung thar kaia Mizoram pum district inelna a pahnihna dinhmun a luah chu ropui a ti hle tih a tarlang. Faina kawnga theihtawp chhuaha hmalatu Siaha mipuite, NGO te, VC te leh official- te an fakawm hle a ti a, theihtawp chhuaha hmalam pan duhna rilru nen an thawh thin avanga tun dinhmun thleng pha a ni tiin an thawhhona a ropui takzet a ti. Pu K Chhuabei chuan pahnihna chu duhtawk mai lovin hma lam pan zel turin a sawm a. Pahnihna Lawmman la thei khua ni si intihsiak hun lại chiaha fai lovin nunphungah bet tlat tura inzirtir a pawimawh hle a ti bawk.

Siaha District Bawrhsap Pu VL Hruaizela Khiangte chuan kalkhawmte chu chibai a buk a, ‘state sawrkar leh MADC bakah VC, NGO leh mimal tin te thawhhona zara khawpui fai inelnaa pahnihna Kan ni thei chu a lawmawm hle’ a ti. UD&PA buatsaih inelnaah chuan tehfung (criteria) hrang hrang a awm a, chung tehfung zingah chuan Kan chakna leh chaklohnate hrechiang a , hmasawn nan hman thiam a pawimawh hle a ti. Fai chu a hrisel a, a nuam a, Pathian an teuh berna a nih thu tarlangin mipui te chu mahni In leh a vel tihfai kawngah tang sauh sauh turin a sawm bawk a ni. Moral transformation a tul hle tiin Kan hma lawka district beautification neih turah pawh tang lehzual a, khawpui fai bakah khawpui mawi leh hmuh nuam siam turin tan lak thar a tul a ti a, boruak thianghlim siamtu thing leh pangparte phun uar zual zel turin a sawm bawk a ni.

Vawiin programme -ah hian Rev Thylua Hlychho chuan devotion a hmang a. Sr LAO, MADC Pi S Lalmuanpuii chuan faina kawnga an hmalaknate leh Siaha khawpui chhunga grey area an neihte tarlanna a nei a, Rev K Laichhua Azyu, ECM Assembly Moderator chuan tawngtaina neiin vawiin hun chu tihtawp a ni. ‎