4128/2023-2024

Dated Siaha 12th March 2024 : Vawiin khan Model Career Center, Siaha bultumin National Career Service Project- hnuaia program pawimawh tak 'Career and Vocational Guidance Program for outgoing College Students of Government Saiha College, buatsaiha a ni a. Pu Vanlaltlanchhunga, Associate Professor, Government Saiha College, chuan hun kaihruaiin, Pu Reuben T. Kompa, District Labour Employment Officer (DLEO) chuan Resource Person niin a hmanpui.

Pu Reuben T. Kompa chuan eizawnna mumal tak nei turin rilru ngaihtuahna sen a tul tawh takzet a ti a. Eng hna pawh thawk thei tura thiamna tak tak neih a tul tih sawiin, mithiam tan chuan hnathawh tur a awm reng a ni, a ti. Mahni tuina leh thiam zawng tak hriatchian a pawimawh hle a, tuihlohna lam pang beih vak hian hlawhtlinna a thlen lo a, mahni tuina tak hi theitawpa bawhzui a pawimawh hle a ti. Tun laiah chuan sawrkar hna in mi zawng zawng a daih tawh meuh lo a, mahni kutke a ding thei tura rilru siam pawh a tul hle a ti.

Pu Reuben T. Kompa chuan zirlaite chu College-a an thil zirah duhtawk mai lo tura chahin, Vocational Training - lamah pawh ke pen tel turin a sawm a. Zirlaibua thil zir hian awmzia thui tak nei mahse, a tak a hnathawk thei tur chuan training tha tak neih a ngai a ni, a ti. Zirlaite zinga hnathawh tur zawng tan District Employment Exchange- ah employment registration tih theih reng a ni a ti a, Career Guidance duh tan Model Career Center- ah pan theih reng an nih thu a tarlang bawk.

Pu Buddha Singh, Associate Professor, Government Siaha College, chuan lawmthu sawina neiin hun a khar a ni.