2774/2023-2024

Aizawl, 10th November 2023: Vawiin khan MFM Villa,Durtlang-ah Governor Dr Hari Babu Kambhampati chuan Mission Foundation Movement, Durtlang hnuaia Geriatric Caregivers zirchhuak te graduation Day chu Khuallian niin a hmanpui a. He hunah hian thla 3 chhung course zir chhuak, Care giver training batch hmasa ber mi 25 batch te hnenah certificate hlan a ni.

Governor chuan tuna MFM, Durtlang hmalakna pawimawh tak takte chu fakin hna tamna sector hrang hranga thiamna tangkai zirtirna kawnga Mizo thalaite tana an hnathawh te chu thil lawmawm tak a ni tih a sawi a. Vawiina zirlai 25, Care Giver training chhuak ta te chu lawmpuiin hmalam hun eng tak an nei tih a sawi. Ram changkang tam tam zawk ah kum upa lam an tam chhoh zel avangin kum upate enkawlna kawngah hna thawh tur a pung chak hle a, hei hi India Hmarchhak thalaite leh a bikin Mizo thalai, hawihawm leh themthiam tak tak tena an thiam sa leh tlem training neih hnua awlsam taka an thawh theih a ni a, Japan, Malaysia, Singapore leh hmundangah te pawh he hna hi mamawhna a sang tawh hle a ni a ti.

Governor chuan Mizo thalaite zingah Nurse leh Healthcare Professional hnathawka hmun hrang hranga awm te an pung zel a. Mizo thalaite hian an hnathawhna hmunah fak an hlawh em em a, tunah hian ram pawnah leh India ram chhungah Mizo thalaite tan Healthcare sector-ah hlawh tha tak neiin hnathawh tur tam tak a awm mek a. Sawrkar hna a tlem em avangin mi zawng zawng tan sawrkarah hna thawh tur a awm tam tawk bawk si loa, hetiang ang lama kan thalaiten hnathawh an intihhmuh hi a hun hle a ni a ti.

Full Speech of Governor: dipr.mizoram.gov.in/post/speech-of-dr-hari-babu-kambhampati-honble-governor-of-mizoram-on-the-occasion-of-graduation-ceremony-of-geriatric-caregivers-under-mission-foundation-movement-mfm-at-mfm-campus-durtlang-on-10th-november-2023

Pu R.Vanlalzauva, Director, MFM in khualthate chawimawina hun hmangin program hi bul tan a ni a. Hei hi inlawmna thusawiin Pu Lalthangmawia, Chairman, MFM chuan a chhunzawm a. Hemi hnu hian Governor hnen atangin graduate ten certicifate an dawng a. Governor thusawiin chhunzawmin  Pi Christina Zothanpuii, Principal, MFM School of Nursing chuan lawmthu sawiin huntawp a khar a ni.