2773/2023-2024

LUNGLEI; the 10th November,2023: Nimin chawhnu dar 1:00Pm khan District Election Officer, Lunglei District Pi Ramdinliani office chamber-ah kumin MLA Inthlanpuia Returning Officer te, Asst.RO te leh Nodal Officer ten nen Election Review meeting neih a ni a.

He meetingah hian Official tin ten an an mawhphurhna chanvo bik theuh an hmalak dan te, feedback an dawn te, hmasawn a ngaihna lai te leh tih chhunzawm atan a tha tura an hriat te report an pe.

Kum 80 chin chunglam ten mahni inlum atanga Home Voting an tih theih reng laia Polling Station a vote lo thlak hram hram te an lo hlut zia entirna Appreciation certificate leh Mug(Nopui) an lo pek zel chu District dangin an tih ve miah loh thil a ni a, thil chhinchhiah tlak tak a nih thu tarlan a ni bawk.

Nimin meeting-ah hian inthlan that(Re-Poll) ngai miah lova, boruak muanawm tak hnuaia Polling  Station 176 a vote  thlak thei a ni chu lawmawm an tih thu tarlangin, Lunglei District mipui te, Candidate  leh Party workers ten Election Commission  of India(ECI) in tihtur a tih leh tihloh tur a ti te an zawm that thu te, Model Code of Conduct bawhchhiatna lian tha awm lo thu te tarlan a ni bawk.