2772/2023-2024

Aizawl, the 9th November, 2023: General Election to Mizoram Legislative Assembly, 2023 atana Mizorama vote thlak that (Repoll) ngai awm chhun, 20-Aizawl South-III (ST) Assembly Constituency huamchhunga awm 20/13 Muallungthu Polling Station-ah Repoll nei turin engkim peihfel a ni.

Election Commission of India (ECI) in inthlan that a nih tur thu leh a hun tur a rawn hriattir atangin Election Department leh District Election Office, Aizawl chuan buaipui tul angte bawhzuiin hma a la nghal a. Naktuk November ni 10, 2023 (Zirtawpni) zing dar 7 atanga tlai dar 4 inkara Repoll nei turin engkim peihfel a ni.

20/13 Muallungthu Polling Station-a inthlan buaipui tur hian Polling party hran hlak District Election Officer (DEO), Aizawl chuan a ruat a. Vawiin chawhnu dar 3:00 khan an duty-na tur hmun panin DC Office, Aizawl an chhuahsan a, chawhnu dar 3:40 khan an duty-na tur hmun Polling Station, Muallungthu Community Hall an thleng fel a ni.

Repoll neih tur chungchangah vawiin khan Commissioner & Secretary, General Administration Department chuan Section 25 of the Negotiable Instruments Act, 1881 in thuneihna a pek angin 20/13 Muallungthu Polling Station huamchhunga Sawrkar hnathawkte’n vote an thlak vek theih nan Public Holiday a puang a. Election Commission of India atanga thupek hmuh bawhzuiin Commissioner of Excise & Narcotics, Excise & Narcotics Department pawhin Rule 5 of the Mizoram Liquor (Prohibition) Rules, 2022 in thuneihna a pek tlawhchhanin vawiin November ni 9, 2023 (Ningani) tlai dar 4:00 atanga vote thlak that (Repoll) ni naktuk November ni 10, 2023 (Zirtawpni) tlai dar 4:00 thleng 20-Aizawl South-III (ST) AC huamchhungah zu khap burna Dry Day puan a nih thu a chhuah a, hemi hun chhung hian Military Canteen huam telin zu zawrh, hralh chhuah leh in khap tlat a ni.

Election Department chuan Repoll neihna tur huamchhunga cheng mipuite, Candidate leh Political party-te chu inthlanna muanawm, felfai, dik leh langtlang buatsaih a nih theih nana thawhpuiah a sawm a. Silent Period kalpui mek chu tha taka zawm a, Campaign rawngkai reng reng leh Model Code of Conduct bawhchhiatna laka insum turin a chah nawn leh a ni.