1209/2024-2025

Aizawl, the 18^th July 2024: Vawiin chawhma khan Governor Dr Hari Babu Kambhampati chuan NHIDCL- Regional Office Aizawl hotute chu Raj Bhavan-ah meeting a neih pui a. He hunah hian NHIDCL ten Mizoram chhunga National Highway siam hna hmun 8 a an neih chungchangte Power Point Presentation hmanga thlirho a ni a. NHIDCL hotute hian kawngpui pawimawh tak  Vairengte – Sairang leh hmun danga hna thawh theih a nih loh chhan te an sawifiah.

NHIDCL hotuten kawngsiam hna hmun thenkhatah mimal hmalakna leh dodalna avanga hna a khaihlak thin thu an sawi a. An harsatna lian ber erawh kawng laihna tur ruahman chungchangah sawrkar department pahnih inremsiam theih loh vang a nih thu an sawi. Hemi chungchangah Governor Dr Hari Babu Kambhampati chuan NHIDCL hnathawk te chu beidawng mai lovin, Mizoram tana hmasawnna ruhrel pawimawh hmasa bera chhal theih, NH kawngpui laih zau leh NH Kawngpui siam hna thawh a nih theih nan, an harsatna tawh chu chinfel dan zawng chhunzawm zel turin a chah a. Hmalak chhunzawm dan tur pawh sawipui nghalin, amah pawhin Ministry lamah a theih dana umzui a tum thu a sawi.

Governor Dr Hari Babu Kambhampati chuan NH Kawngpui te chu Mizoram tana a pawimawh zia mipui nawlpui chuan kan hre vek tawh a. Hetih lain NH Kawngpui zingah pawh, Mizoram tana Nunna Hnar tia chhal theih Vairengte – Sairang kawngpui 4 lane a siam hna a thawh theih loh tawp chu pawi a tih zia a sawi a. He kawngpui hi a tlang rual rualin Mizoramah nitina kan khawsakna atan sum senso nasa takin a tlem phah dawn a, bungraw lei man nasa takin a tlem phah bakah Mizoramah hmasawnna kawng hrang hrangin a thlen thei dawn a ni a ti. Chuvangin, hetiang khawpa Kawngpui pawimawh hi a rang lama kan thawh theih a pawimawh a, Department pahnih te pawh an inkara chinfel tur awm te, chin fel tumin theihtawp an chhuah a ngai a ni a ti.

Tun dinhmunah NHIDCL hian Mizorama  project 8 a thawh mek  zingah Dulte – Champhai (NH-6) chu zawh fel a ni tawh a. Aizawl – Tuipang ( NH -54) chu 91% thawh zawh niin kumin December thla hian zawh fel hman beisei a ni. Seling – Dulte (NH - 6) chu 95% zawh a ni a, Lunglei – Tlabung ( NH-302) 43% zawh tawh a ni a, Keifang – Tuival (NH -102B) chu 56% zawh niin June 2025 ah zawh felt um a ni a, Zorinpui – Longmasu (NH-502 A) chu February 2023 khan thawh tura peihfel a ni naiin Land acquisition leh Forest Clearance fel lo avangin a la thawh theih loh a, 4 Laning of Vairengte – Sairang ( NH -306 & 6) chu kawnglaihna tur ram a fel thei lo a, Aizawl Bypass (NH-6) Sairang leh Aizawl inkalpawhna tur pawh kawnglaihna tur ram a la fel hlei thei lo a ni.

NHIDCL aiawh hian Pu Virender Jokhar, Executive Director (Project), Pu Dhairya Vaibhav, Sr Manager (Projects) leh hotu dang te an tel a ni.