1210/2024-2025

Dated Kolasib the 18th July 2024: Vawiin khan Public Account Committee chu an Chairman Pu Lalchhandama Ralte, MLA hovin Kolasib District Court ah spot visit an nei a, CAG Report 2018-19Law and Judicial Department kaihhnawih thil a kal an ni.

Vawiin a PAC aiawh member te hi Pu Lalchhandama Ralte,MLA, Chairman PAC, Pu C Ngunlianchunga MLA, Dr.K. Beichhua MLA, Lt Col. Clement Lalhmingthanga MLA leh Pu VL Zaithanzama MLA te an ni. Zing dar 10 ah Kolasib Circuit House ah Pu Robert C Lalhmangaiha Kolasib DC, Pu David Lalthangliana, Kolasib SP leh Pu R Vanlalena Kolasib District Judge ten lo dawngsawngin tukthuan an ei pui a. Hetah hian inkawmhona tawi neiin Kolasib DC Pu Robert C Lalhmangaiha chuan Assembly a Body pawimawh tak Public Account Committee in an lo tlawh chu a lawm zia sawiin, Program tluang taka an hman theih nan duhsakna a hlan a ni.

Zing chaw eikhamah hian Kolasib District Court panin District Court Conference room ah Judge Pu R Vanlalena hovin inkawmhona neiin, PAC zawhna te chhangin leh hriatfiah ngai te inhrilhfiahna hun tha tak an hmang a. Court lam hian an mamawhte pawh thlen nghal in, chung zingah chuan thawktu indaihlohna, a bikin Officer ah leh thawktu nghet ah indaihlohna a san hle thu an thlen bawk.

Kolasib District Court a hun an hman zawh hian Fast track court sak lai mek pawh en nghalin, engineer leh contractor te nen an hnathawh dan leh an hna ti muangtu leh chak zawk a hna a kal theih dan tur an sawiho a ni.

Public Account Committee member te hian Kolasib a hun an hman zawhin chawhnu lamah Mamit ah Spot visit tho nei turin an tlang nghal a ni.