718/2023-2024

Aizawl, the 8th June 2023: Pachhunga University College (PUC), constituent College of Mizoram University chuan vawiin khan an Seminar Hall-ah kumin NIRF Ranking a India ram pum huapa college tha ber 34-na nihna a hauh avangin lawmna hun a huaihawt a. NIRF Ranking 34th lawmna denchhen hian ni 2 awh tur, International Symposium on " Sustaining Nature & Tribal Worldview: An ecocritical approach to Literature" a buatsaih. He hun hi Governor Dr Hari Babu Kambhampati, Chief Rector, MZU ni bawk chuan khuallian niin a hmanpui a. Prof. Lalnundanga Registrar, Mizoram University pawh Khualzahawm atan sawm a nih angin a tel bawk a ni.

Tun hnaiah khan India RANKING 2023 chu National Institutional Ranking Framework (NIRF), Ministry of Education, Government of India chuan a ti chhuak a. NIRF ranking thar berin a tarlan dan chuan, tehfung hrang hrang hmanga the a nih hnuah Pachhunga University College(PUC) chu India rama College tha bik 100 a thlanchhuah zingah 34-naah a dah a. Hei hi nikum lama NIRF Ranking a PUC rank 45-na atanga the chuan hmasawnna lian tak niin India Hmarchhak huam chhunga College dang te NIRF top 100-ah hian lang an awm lo a ni.

Governor Dr Hari Babu Kambhampati chuan PUC hlawhtlinna chu Mizoram tana inchhuanna tham a ni tih sawiin an hlawhtlinnaah thinlung takin a lawmpui tih a sawi hmasa a. He dinhmun thleng tura theihtawp chhuahtu zawng zawngte hnenah lawmpuina a hlan nghal bawk. PUC in he hlawhtlinna lawmna atan International Seminar an huaihawt chu thil remchang tak a ni tiin Symposium buatsaihtu English Department, PUC leh he Symposium a tel zawng zawng te hlawk taka hun hmang turin duhsakna a hlan nghal a ni.

Pachhunga University College chuan hlawhtlinna lian tham thawk chhuak turin theihtawp a chhuah bakah a thawktu – zirtirtu leh office hnathawk te bakah zirlai ten an theihna sang ber a hlan thin nia a lo hriat thu a sawi a. Hetianga, awmze nei, thil tum chiang taka nei chunga hmalam an pan theih zel phawt chuan hun reiloteah PUC chu India rama College tha filawr a la nih theih a rin thu a sawi a. Nakin lawkah Deemed University dinhmun pawh an la hlawhchhuah a beiseiawm hle a ni a ti. National Education Policy 2020 hmathlir anga PUC hi a kal zel a nih chuan Teaching intensive and Research intensive university a la nih thuai a rin thu a sawi bawk a ni.

Full Speech of Governor: dipr.mizoram.gov.in/post/speech-of-dr-hari-babu-kambhampati-honble-governor-of-mizoram-on-the-occasion-of-celebration-of-pachhunga-university-colleges-34th-nirf-ranking-inaugural-function-of-two-day-international-symposium-on-sustaining-nature-and-tribal-worldview-an-ecocritical-

Pachhunga University College (PUC) hi Mizorama college kan neih zinga upa ber leh hmun nei tha ber a ngaih a ni a. PUC ram hi Acre 122 laia zau a ni. Tunah hian Arts, Science, Commerce leh Management Streams ah te zirna kalpui mek niin department 23 a awm a, zirlai 3000 chuang an nei mek. NAAC in CGPA of 3.47 out of 4 rating peiin A+ grade College a ni mek.

Prof H. Lalthanzara, Principal hnen atangin inlawmna thusawi atangin PUC lawmna leh symposium hi tan a ni a. He hunah hian Dr Lalhriatzuala, Head, Dept. of Physics hnen atangin NIRF ranking chungchangah leh he hlawhtlinna nei tura PUC in hma alak dan te report ngaihthlak a ni a. Symposium chungchangah Dr Vanlalveni Pachuau, Organising Secretary in report pe lehin he mi zawh hian Dr Henry Lalmawizuala, Head, Department of English chuan lawmthu sawiin huntawp a khar thung a ni.