No.4194/2021-2022

Aizawl, the 7th March 2022: Governor Hari Babu Kambhampati chuan vawiin khan State Bank of India (SBI), Mizoram hotute chua Raj Bhavan-ah a kawm a. Mizoram mipui te hnena Bank tangkaina leh mawhphurhna te uar zawka zirtirna pek a tul na te leh social security scheme hrang hrang dil theih te chungchang sawi uar a tul dan te sawiho a ni a. Mizoram sum thawh chhuah ti pung tura Entrepreneur te pawimawh na leh Bank awlsam zawka an dawr theih a pawimawh chungchang pawh sawi a ni.

Governor Hari Babu Kambhampati chuan Mizoram Bank zinga hruaitu leh Bank lian ber SBI in Mizoram hmun hrang hranga mipui rawngbawlna huang a zauh mek chu lawmawm a tih thu a sawi a. SBI bik chuan Central Sawrkar hnen atanga dawn theih scheme tha tak tak te kalpui kawngah leh insurance scheme tangkai tak tak a kalpui kawngah te a thawk tha thawkhat tih a sawi a ni. Hetih lai hian Mizoram mipui tam zawkin Bank hnathawh leh Bank tangkaina kan la hrechiang tawk lo a. SBI chu Lead Bank a nih anga hmahruaitu ni tur leh he zirtirna kalpui kawngah theihthawp chhuah turin a duh tih a sawi bawk a ni.

Governor chuan Mizoram hmun hrang hrang a tlawh tawh a, sawrkar hotute, kohhran hruaitute leh tlawmngai pawl hruaitute pawh a kawm thin tih a sawi. Heng hunah te hian Mizoram chhungah Central Social Security Scheme leh Insurance Scheme tha tak tak te Mizoram mipuiin an dawng em tih chungchangte a lo chik thin a. Pawl hruaitute leh mivengva zawk a ngaih te pawn heng scheme hi an la hmelhriat chiang lo hre tih a hmuhchhuah thu Bank hotute hnenah hian a sawi a. Hei vang hian Bank tam zawk chuan an customer te hnenah hamthatna awm thei te an sawifiah tawk lo thin tih a chiang hle a ni a ti. Scheme tha tak tak PMSBY, PMJJBY, APY, PMJY, SUI, etc atanga hamthatna Mizoram mipui tam zawkin an dawnglo chu pawi a tih thu sawiin Bank hnathawkte tan nasat a la ngai tih a sawi a ni.

Kuthnathawktute leh sumdawngte tana tangkai PMMY, PMEGP, KCC, MSME, etc te pawh mipuiin an la hrechiang lo hle a. Heng loan tangkai tak tak te hi kan state sum thawhchhuah tipung tura kan mamawh em em entrepreneur tam tak an rawn awm theihna atana thil tangkai a ni a ti. Thalaite zingah sawrkar hnathawh tumna tlatna tih nep a ngai a; entrepreneur huanga an zuan luh duhna tura fuih an ngai a. State hmasawn ni turin thalai tam tak entrepreneur ah chher kan tum a tul a; he thilah hian Bank lam pawhin bul tanna atana loan tha tak tak an neih te an puanzar that viau a ngai a ni a ti.

Bank mamawhna a sang a, cashless transaction kan la kalpui tak tak theih loh avangin ATM mamawhna pawh a san thu a sawiin Bank ten tan an lak a ngai a ni a ti. Governor chuan hmun tam takah Bank an la awm lo tih a hriat thu sawiin hmun thenkhatah phei chuan Bank dawr turin mi tam tak engemaw chang chuan an tlaivar thin tih a lo hria, pawi a tih thu a sawi a. Mizoram kil berah pawh hmasawnna thlen tur leh mipuite thawhchhuah tipung turin Bank dawr theiha a awm a ngai a ni a ti.

Tunah hian SBI, Mizoram chuan Branch 46, CSP 27 leh ATM Booth 106 an nei mek a. Saving Bank leh Current Accounts belhkhawm 3,20,357/ an enkawl mek a; December 2021 thleng khan Rs 5,319.38 Crores an lalut a, Rs 2,264.26 Crores an puktir thung a ni. December 2021 thleng khan Mizorama Bank hrang hranga sum dahluh zawng zawng zat atanga chhut a 39.58% chu SBI in a lalut a; Loan leh thil danga puk chhuahtir zawng zawng zat atanga chhut a 33.48% chu an pek chhuak niin Priority Sector a pawisa puktir zawng zawng zinga 30.16 % pawh SBI pekchhuah a ni bawk a ni.

Governor leh SBI hotute inkawmnaah hian SBI aizawhin Pu LP Lalchangkima, Regional Manager, Pi Lalnilawmi, Chief Manager & SLBC Coordinator, Pu Lalmawizuala Sailo, Chief Manager leh official dang te an tel a ni.