2765/2022-2023

Aizawl, the 23rd November 2022: Vawiin chawhma khan Assam Rifles’ Investiture ceremony – 2022 chu Circular Lawn, Raj Bhavan-ah 2 Assam Rifles Bn chuan Headquarters 23 Sector Assam Rifles leh Headquarters office of Inspector General Assam Rifles (East) te ruahmanna siam angin an buatsaih a. He hunah hian Governor Hari Babu Kambhampati chuan Assam Rifles sipai 18 hnenah chawimawina tangkapui leh thuziak a hlan a ni.

AR investiture Ceremony 2022 ah hian Governor’s Gold Medal dawngtu 11 Governor’s Silver Medal dawngtu 7 an awm a ni.

Governor Hari Babu Kambhampati chuan AR investiture Ceremony 2022-ah ram venghimtu sipai chhuanawm tak tak 18 in chawimawina an dawng thei chu lawmawm a tih thu sawiin ram mipui ten India sipai huaisen te kan thlamuanpui a ni a ti a. Ram venhimna leh ram inpumkhatna atana theihtawp chhuah zel turin Assam Rifles officer te leh sipai te chu a chah chhunzawm a ni.

Mizoramah leh Hmarchhak bialah Assam Rifles te chu an awm na a rei tawhin sulhlu tha tak tak pawh an hnu chhiah nual tawh tih a sawi a. Tunah pawh hian sipai tena ram ralmuan laia an thawh thin, khua leh tui te tana tangkai tak tak – ramri venhim, ruihlo umbo na kawnga penchhuah, chhiatrupna lo thlen thulh a Civil Administration tanpui bakah hmun kilkhawra cheng te tih hmasawn hna te Assam Rifles ten tha takin an thawk mek a ni a ti. Assam Rifles ten mipui rawng an bawlna program pakhat – Civic Action Program hnuaia thingtlang kilkhawr zawka cheng te tana a thlawna Doctor thiam rawnna hun buatsaih thin chu thil tha tak a ni tih a sawi a. Mizorama ruihlo lo lut tur ven hna pawh Assam Rifles te chuan an thawk tha hle tih a sawi bawk a ni.

Full Speech of Governor: dipr.mizoram.gov.in/post/speech-of-dr-hari-babu-kambhampati-honble-governor-of-mizoram-on-the-occasion-of-investiture-ceremony-of-governors-gold-and-silver-medals-to-assam-rifles-personnel-at-circular-lawn-raj-bhavan-on-23rd-november-2022

Vawiina AR investiture Ceremony 2022 hmanna hunah hian Governor Hari Babu Kambhampati chuan 23 Sector AR hnuaia battalion pahnih - 2 (Lakhimpur) Bn Assam Rifles leh 8 Assam Rifles te hnenah hnathawk tha chawimawina thilpek a hlan bawk a ni. Assam Rifles hi India rama paramilitary force upa ber a ni a. Investiture Ceremony-ah hian hnathawk tha te an inchawimawi thin a. He chawimawina hi Sipai huaisen te hnathawh hriatpuina leh tih phurna atan kum 1957 khan Governor of Meghalaya chuan bul a lo tan a ni.

AR investiture Ceremony 2022-ah hian Major General Vinod Kumar Nambiar, YSM, SM, Inspector General Assam Rifles (East), Brigadier Digvijay Singh, SM, Deputy Inspector General, Headquarters 23 Sectors Assam Rifles, Commandant Anil Kumar K, Commandant (Administration), Headquarters 23 Sectors Assam Rifles, Colonel Rajesh Kumar Nayak, Commandant 2 Assam Rifles, Assam Rifles sipai te leh sawm bik pawnlam mi te an tel a ni.