974/2022-2023
Aizawl, the 21st June 2022: Vawiin chawhma khan Durbar Hall, Raj Bhavan-ah Governor Hari Babu Kambhampati chuan Pu JC Ramthanga, IAS Retired chu Chairman, Mizoram Public Service Commission(MPSC) atan rinawmna thu tiam tirin a lalut.

Chairman, MPSC thar lakluhna hi Pi Renu Sharma, Chief Secretary chuan kaihruaiin he hunah hian Member, MPSC atana Pu JC Rathanga ruat a nihna lehkha a chhiar chhuak a. Hemi zawhah hian Governor Hari Babu Kambhampati chuan Pu JC Ramthanga, IAS Retired chu rinawmna thu tiam tirin Chairman, MPSC atan a la lut a ni.

Chairman,MPSC thar lakluhna hunah hian Chief Minister Pu Zoramthanga, Speaker Pu Lalrinliana Sailo, Dy Chief Minister Pu Tawnluia, Cabinet Minister te, Minister te, MLA te, Official te leh sawmbik mi thenkhat te an tel a ni.

Pu JC Ramthanga hi Pu J. Kailova leh Pi Lalzopuii te fa 8 zinga mi niin kum May 7, 1962 khan a piang a. February 27, 1986 khan Jackie Ramthansangi d/o Zairema nen an innei a. Fa 4 neiin tunah hian Mc Donald Hills, Zarkawtah an cheng mek a ni.

Pu JC Ramthanga hi zirna lamah Master of Arts ( History), NEHU, Shillong a ni a. Lehkha thiam thei tak niin Civil Services service pathum - Armed Forces Hqrs Civil Service (AFHCS), Indian Police Service (IPS) leh Indian Administrative Service (IAS) ah a tling vek a. Ni 21 August, 1989 khan Indian Administrative Service (IAS) a zawm a. Manipur (Manipur - Tripura) Cadre pek a ni. A promotion pawh tluang takin a hun takah kaisang zelin a chho va. IAS a kaisan theihna sang ber Apex Scale (Additional Chief Secretary) chu August 16, 2019 khan a kaisang a. IAS Officer hna a thawh chhung hian Mizoram leh Manipur sawrkarah hna pawimawh tak tak a thawk tawh thin a ni.