1343/2022-2023
Aizawl, the 25th July 2022: Governor Hari Babu Kambhampati chuan vawiin chawhma khan Prof K.N. Satyanarayana, Director, Indian Institute of Technology(IIT) Tirupati leh Prof S.Sundar, Director, NIT Mizoram te chu Raj Bhavan-ah a kawm a. He hunah hian leimin vanga harsatna thleng thin pumpelh chungchang te, science thiamna hmanga Mizorama kuthnathawktute hmalakna tanpuina chungchang te leh NIT Mizoram sak hna thawh dan tur chungchangte an sawiho a ni.

Governor Hari Babu Kambhampati chuan NIT Mizoramin a zirlaite hmakhua ngaia zirna in tha tak taka mithiamte a thawhpui thin chu lawmawm a tih thu a sawi a. NIT Mizoram in campus leh building te an neih hma chuan hetianga mithiamte thawhpui hi a la tul rih dawn a. Thawhhona hrim hrimah hian thil thar tha zawk leh hmasawnna thar a lo awm thin bawk a ni a ti.

NIT Mizoram chu a awmna rei tawh mahse vanduaithlak takin a sakna tur ram chungchangah tihfel ngai te tihfel chhung a rei ta deuh a. Tunah erawh chuan chinfel ngai te pawh NIT Mizoram leh Mizoram sawrkar thawhrimna azarah a fel thawkhat tawh a, a lawmawm hle a ni a ti.

Technology Innovation Hub in Positioning leh Precision Technologies, IIT Tirupati leh NIT Mizoram ten leimin leh a vendan satellite hnathawh chhawr tangkaia zirchianna an buatsaih chu Mizoram tana thil pawimawh em em a ni tih a sawi a. Remote Sensing and Geospatial Technology for Landslide Mitigation and Management in North Eastern Region tih thupui hmanga ni 5 chhunga zirchianna hian DM&R leh hetiang lamah sawrkar hnathawk mawhphur tute zawng zawng thiamna tangkai tak a pek belh ngei a beisei tih a sawi bawk.

Governor chuan mithiamte a kawmnaah hian Mizoram leilung pianhmang leh sik leh sa tlangpui te bakah Mizorama thlai leh thei tha duh bik chungchangte a sawi a. Thlai leh thei thenkhat tan Mizoram leilung a tha bik nia sawiin Dragon Fruit, Lakhuih thei, etec..te chu hmundang aiin Mizoramah a thar tha bik a, Mizorama tharchhuahte chu a tui bik a, tunah hian dragon fruit chin leh thar kawngah phei chuan Mizoram chu India rama hmahruaitu a ni a. Hei hi state dangte pawhin an rawn entawn mek a ni a ti. Governor chuan heng sum chang thei thlai leh thei te hi tunlai science thiamna nena kuthnathawktute tanpui an nih chuan tun aia hlawk zawkin a thar theih tih a sawi a. He,mi kawngah hian awmze nei zawka hmalak a nih theih nan NIT Mizoram pawhin ngaihtuahna seng tan se, campus an neih hunah phei chuan Innovation Hub din thei se a tangkai hlein a rin thu a sawi a ni.

Prof K.N. Satyanarayana, Director, IIT Tirupati chuan Governor hnenah hian Technology Innovation Hub in Positioning and Precision Technologies, IIT Tirupati leh NIT Mizoram te tangkawpin ni 5 chhung awh inzirtirna - training on Remote Sensing and Geospatial Technology for Landslide Mitigation and Management in North Eastern Regionan buatsaih mek tih a sawi. IIT Tirupati chu Remote Sensing and Geospatial Technology ah hmahruaitu an nih thu a sawi a. He thlalem hmanga leilung zirchianna hi kawng tam takah tangkai takin hman theih a ni tih a

sawi a ni. Prof K.N. Satyanarayana chuan Positioning and Precision Technologies chu horticulture, Agriculture, Landslides mitigation leh thil dangah Mizoramin a tangkai pui a rin thu a sawi a. He mi kawngah hian NIT Mizoram nen pawh thawhhona an la neih theih thu a sawi bawk a ni.

Prof S.Sundar, Director, NIT Mizoram pawhin Mizoram tana NIT Mizoram a tangkaina tur te a sawi a. A hmasaberah chuan campus leh building an neihna tur kawngah tanlak phawt an tum tih a sawi a ni. Prof S.Sundar chuan NIT Mizoram sakna tur atan environmental clearance chu hun rei tak buaipui a nih hnuah Mizoram sawrkar leh NIT Mizoram thawhrimna azarah a hmawr bawk tep a ni tawh a. Tunah hian Ministry ah an dilna hi a awm tawh a; hun rei vak loah chuan NIT Mizoram campus siam leh building sak hna pawh tan theih an in beisei tih a sawi a. Phalna a rang lama hmuh a nih theih nan Governor chu Ministry lama nawr turin a ngen bawk a ni. Prof S.Sundar chuan NIT Mizoram hmunhma zau zawng chu 150 Acre vel a ni tih a sawi a. A sak dan tur – blueprint pawh a tha hle nia a hriat thu sawiin sak zawh a nih chuan chuan NIT awm mek zinga tha ber pawl a ni dawn a ni a ti.

Technology Innovation Hub in Positioning leh Precision Technologies, IIT Tirupati leh NIT Mizoram ten training an pek chungchang report Dr Lalthanchami Sailo, Registrar, NIT Mizoram in a pek dan chuan he trainingah hian mithiam filawr tak tak - IITs, ISRO, NESAC, GSI leh University thazual atangin zirtirna pe turin an lo tel a ni.