1344/2022-2023 

Vawiin khan P&E Minister Pu R.Lalzirliana chuan Durtlang Leitan Badminton Club Invitation Championship Tournament chu Durtlang Leitan YMA Hall-ah a hawng.

Minister Pu R. Lalzirliana chuan DLBC ten tournament hawng tura an sawm chu lawmawm hle mah se mahni insitna erawh a na viau a, midang thiam zawk leh inkhel mite tan mi tha zawk awmte sawmlo a amah an sawm chu a inthlahrun thlak hle thung a ni a ti a. Durtlang Leitan chhungah hetiang ang mi tam kal khawm theihna tur hun rei tak awh tur an buatsaih chu inpekna thuk tak nen lo chuan a buatsaih theihloh a ni tiin, an thawhrimna leh an inpeknaah a fakawm a ti a. Minister chuan mizo infiammi ten game tam tak zingah Badminton chu kan khelh uar pawl tak, taksa leh rilru hrisel nan pawh a game tha a ni a ti a. Inkhel miten hlawhtlinna thui tak nei chuan naupan lai atanga training, inzirna an kal tlang a ngai thin a ni tih sawiin, hlawhtlinna kawng chu a awlsam lo a, hrehawm tuar peih te pawh a ngai a ni a ti a. Pu R. Lalzirliana chuan tunhma mizo lehkhathiam hmasa ten exam harsa tak tak, central service exam te an lo paltlang theih thin nachhan pawh hrehawm an tuar peih a, an tum a ruh a, an taima bawk a ni a ti a. Heng kan mi hmasa hlawhtlinna kawngzawh entawnin infiammi te pawhin hmasawnna bakah hlawhtlinna tam tak neih tumin, mahni taksa vawn that leh fitness vawnnun that zel naah taimakna vawng nung reng turin a chah a. Mizo thalai te zingah ruihhlo in a tihbuai tam tak an awm mek a, thenkhatin kan zalenna hmangthiamlo in ruihhlo ngaiin, an nun an hmang mek bawk a, tun dinhmunah ruihhlo kan hneh loh chuan kan hmabak a ko hle a ni tih sawiin, ruihhlo laka fihlim nun nei tur chuan taksa sawizawi a pawimawh tih hriain, inkhelh uar zelin, hriselna ngai pawimawh ila, kan nun a hlim zual zel ang tih sawiin vawiin a tournament a tel zawng zawngte duhsakna a hlanin DLBC Invitation Championship Tournament chu a hawng a ni. 

DLBC Invitation Championship Tournament hi July ni 25 atanga July ni 30 thleng a khelh tur a ni a. Categories 16 ah in elna neih a dawn a, club 33 he inelna ah hian an tel a. Hmeichhia 51 leh mipa 336 telin an vaiin mi 387 an tel a ni. He tournament a tel mipa naupang ber chu kum 11 mi Clement Lalramthlenga, Chanmari West Badminton Club a ni a, mipa upa ber hi Kum 72 mi, Pu K. Lalrammawia, Bawngkawn Badminton Club a ni. Hmeichhe zingah kum 17 mi Liansangpuii, Chaltlang Badminton Club chu naupang ber niin, upa ber chu kum 57 mi Pi C. Laltanpuii, Venghlui Badminton Club a ni.

Attachment

  • Loading attachment...