1234/2022-2023
Aizawl, the 13th July 2022: Vawiin khan Mizoram Gorkha Youth Association (MGYA) te huaihawtin Vanapa Hall-ah Gorkha te tana ziak leh chhiar bakah hnam hmasawnna kawnga thawh hlawk tak, thu leh hla lama miril, Adi Kavi Bhanu Bhakta Acharya piancham vawi 208-na lawmna hun hman a ni a. Governor Hari Babu Kambhampati chuan he hun hi khuallian niin a hmanpui a ni.

Governor Hari Babu Kambhampati chuan Bhanu piancham lawmna pualin Mizoram dung leh vanga Gorkha chhungkuate zawng zawh lawmpuina leh duhsakna chibai a buk a. Bhanu hnathawhte leh a sulhnute chu Gorkha te tan a hlu tih sawi a. Bhanu in Sanskrit atanga Nepali tawnga Ramayana a lehlin hnu atang hian Nepali tawngin nasa takin hma a sawn phah a. Tunah phei chuan Nepali tawng chu India Danpui chhunga 8th scheduled-ah sawrkar hriatpui tawng hrang hrang zinga pakhat a lo ni ta a. Hei hi a ropuiin he hriatpuina pawimawh tak hian hlawkna tam tak a keng tel a ni a ti

Gorkha te chu khawvel ram hrang hrangah awm darh mahse an awmna hmun apiangah midangte nen inrem takin an chengho thei zel lai chu an ropuina a ni a ti. Mizoramah pawh Gorkha te chu rei tak lo awm tawhin Mizote nen inngaih takin tun thlengjn an cheng ho zel a. He inunauna leh inremna lawmawm tak hi chhawm nun zel a nih theih nan Gorkha thalaite pawh vantlang tana luanchhuah leh hna tha thawh kawngah theihtawp chhuah zel turin a chah bawk a ni.

Mizoramah chuan Gorkha chu hnam tlem zawk niin tunah hian mihring singhnih bawr vel chiah ni mahse Mizoram hmasawnna atan chuan tih theih leh theihna sang tak nei nia a hriat thu a sawi a. Hnam tlem zawk te an nih avanga engemaw harsatna an neih theih ang te pawh lo zirchian a, siam rem ngai lai te pawh sawrkar thuneitute lo sawipui a tum thu a sawi a. Gorkha te chu hnam huaisen, rinawm leh ralvengtu atana khawvel puma rinkai an ti tih a sawi a. Tumruhna leh taihmakna nei chunga hmalam pan zel tur leh zirna lamah tan la zual turin Gorkha thalaite chu chahin zirna leh thiamna hi hmasawnna kawng hawngtu leh tumahin an dal theih loh a ni tia sawiin a fuih a ni.

Full speech of Governor : dipr.mizoram.gov.in/post/speech-of-dr-hari-babu-kambhampati-honble-governor-of-mizoram-on-the-occasion-of-208th-bhanu-jayanti-organized-by-mizoram-gorkha-youth-association-on-13th-july-2022-at-vanapa-hall-aizawl

Adikavi Bhanubhakta Acharya hi Nepal rama Tanahu District-a Chundi Ramgha khuaah kum 1814 khan a piang a. Puithiam chhungkua an nih avangin a hranpain sikul kal lo mahse a pa zirtirna avangin ziak leh chhiar lamah a thleng sang hle a. Thu leh Hla lamah hnutchhiah tam tak nei mahse khawvelin a hriat larna chhan ber chu Hindu Sakhaw Lehkhabu Thianghlim, ‘Ramayana’ Sanskrit tawng harsa tak atanga Nepali Tawng-a a lehlin avangin a ni. Gorkha hnahthlak hnam hrang hrang te inkara inpumkhatna siamtu ah a ngaih a ni a. Kum 1868 khan a thi a ni.

208th Bhanu Jayanti lawmna hun hi Anup Chhetri, President, MGYA(C) chuan a kaihruai a. He hunah hian infuih tharna te, zai leh lama intihhlimna hun nen a hman a ni a. Rajkumar Shahi, Vice President, MGYA(C) chuan lawmthu sawiin huntawp a khar a ni.